Loron haat ona BNCTL loke nia odamatan ba idozu sira atu foti sira-nia osan, maibé númeru idozus ne’ebé mai forma kontinua aumenta, sa tan hela loron ida tama ona ba loron boot Natal.

Tuir observasaun jornalista jornal INDEPENDENTE iha BNCTL hatudu katak, idozu no invalid sira maske la konfortavel, maibé kontinua obriga an hodi bele simu sira-nia direitu.

Idozu ida, Duarte Guterres husi Bekora, preokupa ho atendimentu BNCTL.

Tuir nia, situasaun hanesan ne’e sempre akontese bainhira idozu sira ba simu sira-nia osan.

Nia dehan, loloos tenke iha atendimentu ne’ebé di’ak, prepara fatin ne’ebé konfortavel no dignu,  no fatin ne’ebé bele halo idozu sira kontente bainhira simu sira-nia osan.

“Preokupasaun boot tanba ba ema ne’ebé ho kondisaun normal la kestionavel, maibé ba idozu sira ne’ebé inkondisional, moras, defisiente, sira tenke obriga an mai,” nia hatete.

Di’ak liu, Duarte dehan, bainhira besik loron boot, pagamentu ba idozu sira halo de’it iha kada suku.

Iha fatin hanesan, idozu Filomena Soares, husi suku Na’i Feto mós preokupa ho situasaun ne’ebé sira hasoru.

Nia husu ba governu atu hadia lalais sistema atendimentu ne’e iha tempu besik nune’e idozu sira bele simu osan hodi atende netik nesesidade ruma ba loron boot ne’ebé besik daudauk ona.

Ba preokupasaun hirak ne’e, Prezidente Instutu Nasional Seguransa Sosial (INSS), Ministériu Solidariedade Sosial no Inkluzaun, Longuinhos Armando hatete, durante nia mandatu hahú husi 2019 to’o 2020 pagamentu ba idozu sira laos ona iha kompetensia postu Administrativu, maibé halo pagamentu iha kada suku.

“Ami husu ba familia sira ne’ebé inan-aman ka ferik ne’ebé moras, lao labele ona, lalika lori mai iha fatin pagamentu ka banku, maibé husu atu informaba xefe suku hodi hatutan ba BNCTL hodi halo prosesu pagamentu direita ba sira (idozu) nia uma,” dehan nia.