Diretór Ezekutivu FDCH, Júlio Aparício informa, governu Timor-Leste liu husi FDCH estabelese kooperasaun ho Embaixada EUA hodi haruka Timor-oan ba kontinua estudu iha nivel universidade iha Amerika.

Nia esplika, objetivu husi estabelesimentu akordu kooperasaun ne’e atu kontinua mantein servisu hamutuk entre FDCH ho Embaixada Estadus Unidus liga ho programa dezenvolvimentu rekursus umanus, liu-liu iha bolsu estudu ba Timor-oan sira ne’ebé finansia ho parsial husi FDCH.

Ida ne’e, nia hatutan, nu’udar oportunidade ba joven sira hodi hala’o sira-nia estudu iha Amerika liu husi programa Fulbright Scholarship ne’ebé loke kada tinan.

“Ita haruka ona Timor-oan na’in tolu ba estuda iha Amérika, maibé na'in rua mak ba eskola uluk ona hela ida mak sei tuir kursu, depois kursu remata foin ba tuir,” dehan Júlio, iha nia knaar fatin, Kolmera, Kinta (09/01).

Bolseiru na’in tolu ne’e, nia dehan, kontinua estudu iha EUA ba nível mestradu iha área administrasaun públiku no área tasi nia.

"Sira na'in tolu ne'e ida iha área administrasaun públiku, ida estuda ba área tasi nia, ida sei tuir kursu hela ne'ebé hotu mak foin ba eskola no (foin deside) ba iha área saida. Sira ne'e ba nível mestradu hotu."

Fundu ba bolseiru na'in tolu ne'e kada tinan kada bolseiru hetan rihun $50, signifika ba sira na’in tolu hetan alokasaun fundu rihun $150 kada tinan.