Sentru evakuasaun neen ne’ebé sei ativu hela mak hanesan, Dom Bosco Comoro, Kapela Hera, EBC-Akanunu, Kampu Real Madrid Manleuana, Restorante Metiaut no Rate-Ain.
“Familia ne’ebé agora dadauk sei iha sentru evakuasan neen hamutuk 140 ho ema 730, tanba familia hirak ne’e hetan uma estragus total,”dehan nia hafoin remata inkontru ho Primeiru Ministru Taur Matan Ruak, iha rezidensia Farol, Dili, tersa ohin (06/07).
Tanba ne’e, Governu liu husi ekipa liña Ministerial ne’ebé lidera husi Miniseriu planu Ordenamentu koalia hela, hodi deside oinsa atu harii fali uma temporariu ba familia afeitadu sira iha fatin ne’ebé Governu deside.
Nune’e, Governu iha opsaun ida mak atu harri uma temporariu iha Hera, maibé iha hela faze diskusaun, hafoin tempu badak sei halo desizaun.
Enkuantu, familia afeitadu ne’ebé iha sentru evakuasaun sira ne’e, kada semana rua SEPS apoiu hahan ba sira inklui sasan dapur nian.
Entretantu, tuir dadus total fatin evakuasaun antes ne’e hamutuk 18 no iha familia uma-kain 2,375 ho total ema hamutuk 9,779.
Asistente Editor: Saturnina da Costa
