Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ne’ebé relata ohin, iha Kapita Dili na’in 24, Baucau 7, Ermera 1, Manatuto 1 no Vikeke na’in 3.
“Total kazu detetadu foun ohin, iha proporsaun kazu sintomatiku hamutuk pursentu 22,2 (22,2%),”dehan nia iha komunikadu, segunda ohin.
Enkuantu, pasiente rekuperadu hamutuk na’in 25 no kazu ativu iha Sala Izolamentu Vera Crus hamutuk 925.
Nune’e, total komulativu kazu konfirmadu sura husi loron 21 fulan-Marsu tinan 2020 to’o loron 5 fulan-Jullu tinan 2021 hamutuk 9,512.
Entretantu, kazu mate ho Covid-19 ba loron ohin, iha feto na’in ida ho idade 17 hanesan sidadaun Timor-Oan, hela Dili.
Matebian hetan moras diagnostika ho sindroma insufisiensia respiratoriu aguda (SIRA), tanba hetan mós Covid-19 (Cycle Theresehold E gene 30,7) no halo tratamentu iha HNGV, iha loron 16 fulan-Juñu.
Enkuantu, iha loron ne’e kedas, ekipa saúde trasfere matebian mai iha Sala Izolamentu Vera Crus hodi halo tratamentu uza oksijenasaun liu husi ventilador.
Hafoin iha loron 18 fulan-Juñu la mellora , nune’e, horseik (04/07) iha oras 16:50 matebian hakotu iss, tanba multiple orgaun failure.
Tanba ne’e, familia ho ekipa saúde hala’o ona funeral tuir protokolu ne’ebé adopta iha TL.
Tuir dadus, ema ne’ebé mate ho Covid-19 hamutuk na’in 25 kompostu husi mane na’in 15 no feto na’in 10.
Ho nune’e, husi horseik (04/07) mai ohin teste PCR ne’ebé Laboratorium Nasional Saúde halo iha Dili hamutuk 441, kompostu husi Vijilansia Sentinela 8, Contact tracing 9, Random Screening 87, Viajem sai husi serka sanitaria Dili 315, Viajen internasional 21 no follow up iha kuarentena na’in 1.
Teste PCR ne’ebé halo horseik (04/07) iha Munisipiu sira seluk, RAEOA no HNGV hamutuk 229, ho detelle hanesan, Baucau 112, Maliana 10, RAEOA 22, Vikeke 7, Ermera 4, Maubisse 10, Suai 17 no HNGV 48.
Ohin, iha Sala Izolamentu Vera Crus halo tratamentu ba pasiente hamutuk na’in 19, iha Obstetrisia na’in 8, medisina interna 8 no sirujia na’in 3.
Asistente Editor: Saturnina da Costa
