Iha Domingu (21/06) maizumenus tuku 01.30 madrugada, matebian ne’e (21) mate hafoin monu tuun husi andar UNPAZ ne’ebé ho as kuaze metru 12. Hafoin akontesimentu ne’e, komunidade sira ne’ebé hela besik area refere halo asaltu ba estudante UNPAZ ne’ebé hala’o estaziu, tanba la satisfas ho akontesimentu ne’e.

Iha loron tuir mai, Segunda (22/06) meiudia, bainhira karreta funerariu ne’ebé tula mate-isin tama iha matebian nia hela fatin, familia hapara karreta hodi lori tuun matebian nia kaisaun no lori ba fatin matebian monu hodi hamulak molok lori ba matebian nia uma.

Bainhira hatoba matebian iha fatin akontesimentu, parte familia kontinua ezije ba UNPAZ atu responsabiliza.

Ba kestaun ne’e, Reitor UNPAZ Adolmando Amaral hatete, imprinsipiu parte familia no universidade laiha problema, maibé tanba matebian mai mate iha area universidade, tan ne’e universidade tenke responsabiliza, maibé presiza hein rezultadu investigasaun.

“Agora daudaun parte hotu mai hato’o ninia ezijensia, maibé akontesimentu ne’e akontese iha tuku 12 kalan no ita hotu laiha ne’e atu hatene motivu loloos husi akontesimentu ida ne’e, ita hotu tenke hein prosesu investigasaun maibé parte universidade prontu atu responsabiliza to’o prosesu halot mate isin ne’e remata,” nia hatete.

Adolmando hatete, daudauk ne’e suspeitu sira iha ona polisia nia liman, tan ne’e husu atu hotu-hotu bele hein prossesu investigasaun no rezultadu husi autopsia hodi bele hatene loloos faktus husi akontesimentu ne’e.

“Pozisaun (familia) sira nian ne’e rajuavel, tanba sira-nia ema mate ona no mate iha area universidade nian, maibé atu hatene nia motive, ita tenke hein prosesu investigasaun.”

“Autor na’in tolu ne’ebé mai ho matebian agora iha polisia hotu, estudante sira ne’ebé envolve mós agora iha polisia hotu. Ha’u mós mai ikus no familia mós mai ikus no rona de’it istoria no koalia tutan de’it, informasaun sira ne’e atu loos ka la loos ita hein de’it prosesu investigasaun nian, familia labele mai halo ninia desizaun ketak,” katak nia.