Liu husi nia diskursu Prezidente Repúblika ne’ebé mós nu’udar Komandante Supremu F-FDTL hateten, desizaun foti Brigadeiru Jenerál Falur nu’udar Vise-XEMJFA hodi sai hanesan kolaboradór diretu mahuluk ba XEMJFA hodi fó akonsellamentu militár.
Nia dehan, Brigadeiru Jenerál Falur Rate Laek, uluk hanesan asuwa’in funu na’in FALINTIL nian iha luta ba libertasaun nasionál, mak ofisiál ida ho karreira ida ne'ebé furak tebes hodi serve Forsa Armada no Nasaun.
Alende ne’e, nia ema ne’ebé ho kualidade profisionál aas tebes hodi hala’o kna’ar komandu no Estadu Maiór nian no matenek boot kona-ba realidade FALINTIL-FDTL, liu-liu iha diresaun no akompañamentu ba Kuartél Jenerál nia lala’ok. Ida ne’e atu dehan katak nia iha kompeténsia atu kaer knaar aas ne’ebé fó fiar ba nia.
“Tanba ne’e maka ha’u hakarak hato’o ha’u nia votu susesu hodi hala’o ninia misaun”, tenik PR Lú Olo, iha okaziaun serimónia pose, iha Palasiu Prezidensiál Bairru-Pité, horisehik.
Nia hatutan, Forsa Armada sira hato’o ona katak sira koñese no komprende didi’ak situasaun ne’ebé Timor-Leste enfrenta hela, ne’ebé kompleksu tebes. Nasaun haree no identifika aan ho ninia Forsa Armada, tau neon metin ba sira nia ierarkia, patriotizmu no dedikasaun ba nasaun.
Nia akresenta, haree ba ameasa la militár sira ne’ebé hakat liu husi fronteira, ne’ebé ezije artikulasaun boot liu, kooperasaun no diálogu hodi prevene no hasoru inseguransa, Forsa Armada tenke fó nafatin apoiu ba populasaun no hametin kooperasaun ho forsa no servisu seguransa.
Entretantu hodi hala’o sira nia misaun, Forsa Armada tenke esforsa aan hodi halo kontensaun ba despeza no uza didi’ak rekursu ne’ebé iha. Atu halo ida ne'e, sira tenke define hikas prioridade sira ne'ebé liga ho afetasaun rekursu no redimensionamentu estrutura maski ho difikuldade oioin ne’ebé militár sira komprende. Ne’e mak asuntu balun ne’ebé sei konta ho partisipasaun no kolaborasaun direta husi Vise-XEMJFA ba XEMJFA nia desizaun ne'ebé de’it.
Nu'udar, Xefe Estadu no Komandante Supremu Forsa Armada, sempre haka’as aan atu tane aas Forsa Armada sira nia naran kmanek no dignifikasaun, tanba konsidera nu’udar importante tebes hodi hametin koezaun no unidade Estadu nian no haforsa identidade timoroan.
Nune’e PR Lú Olo fiar husi ne’e ba oin sira na’in rua Majór Jenerál Lere sei hamutuk nafatin atu hasoru dezafiu sira ne’ebé iha oin, hodi hametin forsa ida ne’ebé modernu no tuir realidade nasaun nian.
Prontu Servisu Hamutuk
Xefe Estadu Maiór Jenerál F-FDTL, Majór Jenerál Lere Anan Timur otimista Vise XEMJFA, Brigadeiru Jenerál Falur Rate Laek sei hatudu kapasidade atu servisu hamutuk hodi dezenvolve instituisaun Forsa Armada ho di'ak liután.
“Ami na’in rua la'ós foin maka atu servisu hamutuk maibé ami servisu hamutuk kleur ona”, dehan nia.
Entretantu, Vise-XEMJFA, Brigadeiru Jenerál Falur Rate Laek hateten, sente haksolok ho tristeza tanba ema bainhira hetan buat foun ida, esperiénsia foun ida mezmu triste ho haksolok iha sentimentu ne’e maka hetan.
“Ami sira ne’e iha ami nia vida tomak moris iha tensaun ho nervozu bainhira ami nunka imajina atu mai iha pozisaun sira hanesan. Maibé la'ós fasil no la'ós forsadu tanba nesesidade de’it”, dehan nia.
Nia hatutan, Vise-XEMJFA ne’e halo parte vizaun instituisaun nian ne’e define ona iha konstituisaun, iha lei Defeza Nasionál, seguransa nasionál to’o iha estatutu sira, ne’ebé hakarak Forsa ne’ebé sai hanesan kredivel, kapas, operasionál ho disponivel atu hala’o misaun kualkér momentu.
