Tuir akuzasaun husi Ministériu Públiku (MP) ne’ebé Tribunál lee sai katak, iha 26 Outubro 2012 iha Marconi, lezada (Ana) husu ba arguidu (Ano) atu ba buka serbisu tanba tinan 2 nia laran Ano la serbisu.

“Lezada dehan ba arguidu ‘tanba sa mak Ó la serbisu iha tinan 2 nia laran ne’e?’. Nune’e arguidu dehan ‘ha’u atu ba serbisu ka la serbisu Ó la manda’. Nune’e arguidu komesa hirus, foti masa mamuk tuda ba lezada maibé la kona no arguidu ba basa lezada nia hasan parte loos,” deklara MP iha ninia akuzasaun liu husi audensia julgamentu iha Tribunal Distrital Dili (TDD), Tersa (11/4).

Ho aktus ne’e, MP akuza arguidu hanesan autór ba krime ofensas simples konjuga ho violensia domestika tuir artigu 145 ne’ebé previstu iha kodigu penal Timor-Leste.

Hatan ba akuzasaun ne’e, arguidu deklara katak faktus ne’e loos hotu. Iha momentu ne’eba nia basa lezada tanba nervozu, maibé hafoin ne’e sira di’ak malu ona no moris hamutuk hanesan feen ho laen.

“Antes atu di’ak malu ne’e ha’u husu deskulpa ba nia, no agora ne’e laiha problema ona,” dehan arguidu ba Tribunál.

Iha fatin hanesan, lezada dehan, iha momentu ne’eba arguidu basa nia tanba nervozu.

“Agora ami nain rua di’ak malu ona no hela hamutuk. Agora laiha problema ida. Arguidu baku ha’u ne’e foin akontese primeiravez, nia basa ha’u tanba ha’u ko’alia maka’as liu,” dehan nia.

Hafoin problema ne’e, lezada dehan arguidu husu ona no fó sala bibi ida ho osan $50 no tua kaisa rua.

Rona tiha deklasaun ne’e Tribunál husu ba MP no Defensór Públiku atu submete ba alegasaun. Liu husi alegasaun MP husu ba Tribunal atu aplika pena prizaun fulan 2 suspende ba tinan 1. Entretantu parte defeza husu ba tribunál atu tetu no sirkuntansia sira ne’e hodi hatun liu tan nia pena husi alegsaun ne’ebé MP husu.

Audensia julgamentu ne’e prezide husi Juiza Singular Francisca Cabral, Ministériu Públiku reprezenta husi Prokuradór José Elo, no arguidu hetan asistensia legal husi Defensór Públiku José da Silva.