Reprezentante Enkaregadu Negósiu EUA, Tom Daley hateten, Estadus Unidus sei fornese adisionál millaun $26.5 hodi hadi’ak labarik nia nutrisaun no literasia iha Timor-Leste ba estensaun programa HATUTAN ba tinan ha'at nia laran.

Nia dehan, Programa HATUTAN finansia liu husi programa McGovern-Dole International Food for Education and Child Nutrition ne’ebé administra husi Estadus Unidus nia Departamentu Agrikultura.

"Ohin (horseik), anunsia nian reflete Estadus Unidus nia kompromisu ba haforsa ita nia relasaun no parseria ne’ebé metin ho Timor-Leste no Povu Timor-Leste,” dehan nia liu husi komunikadu ne'ebe Online INDEPENDENTE asesu, kinta horseik (06/10).

Nia salienta, ho anúnsia ikus liu ba ida ne’e, Estadus Unidus kompremetidu hodi fornese millaun $52 resin ba apoia edukasaun, nutrisaun no saúde ba estudante Timoroan sira liu husi programa HATUTAN.

“Ami haksolok tebes atu kontinua harii tuir programa HATUTAN nia susesu, ne’ebé mak hadi’a ona edukasaun, nutrisaun, no saúde iha eskola hamutuk 445 no komunidade sira no fó benefísiu ba estudante hamutuk 90 resin iha Timor-Leste nia laran tomak iha tinan lima ikus ne’e nia laran,”  nia hateten.

Nia fundamenta, programa ne’e mós sei servisu ho Governu Timor-Leste hodi haforsa prátika no abilidade ba administradór eskola hamutuk 417, profesores sira hamutuk na’in 935, no membru Asosiasaun Inan-aman – Mestre sira hamutuk 1,890.

Aleinde, nia dehan, programa ne’e, sei haforsa to’os na’in no voluntáriu sira no mós hasa’e produsaun agrikola no kapasidade merkadu ba to’os na’in hamutuk 540 hodi kontribui ba sustentabilidade Programa Merenda Eskolar.

Tan ne'e, programa ne’e sei atinji indiretamente membru uma-kain hamutuk 536,295 liu husi hasa’e asesu informasaun kona-ba edukasaun inan-aman, kuidadu ba labarik, saúde, ijiene, nutrisaun, jéneru, agrikultura no empoderamentu ekonómiku.

Enkuantu, tuir planu programa ne’e sei implementa to’o tinan 2027 liu husi CARE International, ho apoia husi Mercy Corps no WaterAid, adisionál millaun $26.5 ba programa ne’e.

Tanba programa ne'e ninia objetivu mak hadi’a literasia ba labarik eskola sira entre idade 3-14 no hasa’e utilizasaun ne’ebé efetivu ba prátika saúde, nutrisaun, ijéniku no jéneru nian.

Entretantu, Programa ne’e sei fó benefísiu direta ba ema hamutuk 171,232, inklui estudante 165,535 liu husi rezultadu ne’ebé di’ak liu ba literasia, nutrisaun, saúde, ijiene no jéneru ne’ebé di’ak liu no programa ne’e sei implementa iha munisípiu Ainaro, Ermera, Manatuto no RAEOA.