Ministru Edukasaun Juventude no Desportu (MEJD), Armindo Maia hateten, kalendáriu ezame nasionál nian deside ona, sei realiza iha Segunda 24 to'o 26 Outubru no ezame lokál sei hahú entre 27 to'o 29 Outubru 2022.
“Kalendáriu ezame nasionál nian ita prepara hotu ona. Tanba ne'e, estudante finalista sira sei tuir ezame nasionál no lokál ba tinan ida-ne'e nian, hahú iha loron 24 to'o loron 29 fulan Outubru,” nia hateten iha Palásiu Governu, Kuarta (19/10/2022).
Matéria ba pontu ezame nasionál nian, MEJD mak prepara rasik no responsável husi unidade kurrikulu nasionál no ezame lokál sei prepara hosi eskola ida-idak.
Tuir planu, MEJD sei halo abertura ba distribuisaun pontu ezame nasionál iha loron 21 Outubru 2022, iha sentru impresaun Komoro, nunee bele halo ona distribuisaun ba kada eskola iha munisípiu sira.
Fasilidade atu apoia estudante sira iha ezame nasionál no ezame lokál ne'e sufisiente ona, tanba MEJD halo ona distribuisaun karteira eskolár ba eskola sira, ne'ebé mak menus mobiliáriu atu apoia estudante sira iha ezame nia laran.
Total estudante finalista ba tinan ida-ne'e hamutuk 58.132, kompostu husi EBC 30.836, ESG 22.525, ESTV 43.039 no Ensinu Rekorrente hamutuk 382.
