“Sira hili dalan fasil, oho bebé no soe bebé, tanba tauk no moe,” dehan Isabel.

Tanba ne’e, tuir nia, la’os lei mak rezolve no estadu de’it mak iha responsablidade, maibé liu-liu inan-aman mak tenke akompaña oan sira iha tempu ne’ebé de’it.

“Bainhira nia (oan) hasoru problema balun, ita bele rezolve nia problema ne’e, atu nune’e oan sira labele hili dalan fasil sira ne’e,” dehan espoza PM Taur ne’e.

Iha oportunidade ne’e, Isabel husu ba estadu no organizasaun relizioja sira atu fó formasaun ka kampaña sensiblizasaun ba sidadaun hotu-hotu, liu-liu kona-ba sira-nia fiar, tanba ema ne’ebé mak iha fiar, nia sempre prontu no brani hasoru dezafiu hotu-hotu no mós ultrapasa dezafius sira ne’ebé nia enfrenta.

Isabel hatutan, bainhira kazu soe bebé mosu, labele fó sala de’it ba feto, tanba feto kous oan tan halo relasaun ho mane.

“Entaun responsablidade ne’e ba ema na’in rua. Problema ba inan (se) nia sente hanesan mesak hodi asumi responsablidade ne’e hotu, nia bele hili dalan fasil mak soe bebé. Tanba ne’e ita labele fó sala de’it ba feto,” katak nia.

Isabel dehan feto labele hanoin de’it kona-ba direitus umanus no igualdade jeneru hodi haluha tiha sira-nia papel hanesan feto.

“Papel feto importante. Tanba, feto hanesan jestor no edukadór, presiza proteje ita-nia an ba dezafius hotu-hotu atu nune’e proteje ita-nia fiar, tanba fiar ne’e mak hanesan seguransa ba ita-nia an,” nia apela.

Tan ne’e, nia husu ba feto no inan sira atu bainhira hetan problema isin-rua labele hili dalan ne’ebé fasil hodi oho bebé, tanba sei iha meius barak atu bele uza hanesan entrega ba parte sosial ka fó ba orfonato ne’ebé mak simu bebé.

“Problema (soe bebé) ne’e la’os akontese ba ema kiak de’it maibé akontese mós ba ema ne’ebé riku, tanba nia stres, lakon fiar no la kontrola nia emosaun no mós laiha balansu espiritual no material entaun nia hili dalan ne’ebe fasil. Tanba ne’e, ita nu’udar (sarani) katolika tenke hakbesik an ba igreja,” dehan Isabel.