Diretór Ensinu Báziku Central, Sergio Vieira de Melho Bekora, Pedro de Carvalho hatete, hela loron de’it 25 loron atu tama ezame períodu daruak, maibé osan ba konsensaun eskolár seidauk halo tranferiénsia tanba ne’e posibilidade sei halo tan empréstimu.
“Desde anu letivu foun hahú husi Janeiru to’o Abril ami hala’o ona ezame primeiru períodu orsamentu la iha, maibé ami uza teknikamente ho ami-nia kapasidade ne’ebé ami iha, no jere to’o primeiru períodu ne’e la’o tiha, agora tama tan ezame segundu períodu ne’e sei realiza iha iha loron 15 Jullu ne’e mós orsamentu la iha,” dehan Diretór Ba Jornalista INDEPEDENTE iha nia knaar fatin Bekora, Kuarta (19/06).
Kona-ba empresta osan, diretór dehan, iha maneira rasik atu empresta osan, importante mak fasilita estudante sira hodi realiza ezame períodu daruak ho di’ak.
Tanba osan konsensaun ne’ebé seiudak simu husi Ministériu Edukasaun (ME), mak eskola deside halo ona enkontru ho diresaun husi edukasaun no mensiona katak osan atu fasilita ba iha ezame períodu daruak la iha, maibé diresaun haruka profesór sira, uza lai maneira ne’ebé iha uza ona iha ezame períodu dahuluk nian, nune’e eskola sei uza maneira uluk tuir kondisaun ne’ebé iha.
Diretór esplika, maneira ka téknika ne’ebé eskola uza mak sei halo tan empréstimu ba parte seluk, nune’e bainhira orsamentu konsensaun iha bele devolve fila-fali.
Tanba ne’e rekomenda ba Ministeriu Edukasaun (ME) atu haree ba asuntu ne’e tanba ezame ne’e atu haree ba aprendisajem ne’ebé iha maibé la iha osan.
Kona-ba preparasaun matéria ba ezame periodu daruak EBC Sergio Vieira de Mello preparadu ona. No Total estudante iha eskola refere hamutuk 1.042, no profesór hamutuk 50.