Molok profesora sira hala’o aula online ne’e parte ITE eskola nian fó uluk formasaun ba kada professor ida-idak, hafoin hahú aula.
Nune’e bainhira estudante sira tuir ezame online, sira mós iha ona materia ba ezame online nian, tanba durante ne’e sira nia prosesu aprendijazem normal.
Tuir orariu ne’ebé MEJD fó sai katak ezame hahú ohin loron 19 fulan-abril, ba eskola sira ne’ebé la implementa serka sanitaria bele ezame ona no eskola sira ne’ebé implementa serka sanitaria bele ezame liu husi online.
“Ho inisiativa rasik ohin ami implementa ezame online estudante sira iha eskola ida ne’e tanba durante ne’e aula lao normal, liu husi online,”dehan nia iha eskola São Pedro, segunda ohin (19/04).
Nune’e tuir orariu ba ezame online nian iha eskola São Pedro Comoro, hahú iha loron 19 sei remata iha loron 24 fulan-abril tinan 2021.
“Ba loron ohin ami fó ezame uluk materia sira mak hanesan, lian portugues, relijiaun no lian materna (tetum), iha oras primeriru to’o remata kuaze estudante sira tuir ezame ho diak”.
Maske estudante sira balun la asesu online tanba ho razaun inan-aman laiha telephone android atu fó ba oan sira, hodi estuda online la signifika atu sira labele selu propinas, maibé ba propinas eskola nian nafatin lao tanba eskola ne’e privadu.
Estudante balun mak failla kona ba prosesu aprendijazen iha online, maibé tenki buka maneira atu nune’e inan-aman sira mós senti di’ak ba oan sira.
Nune’e eskola iha opsaun rua hodi implementa ba estudante sira. Opsaun dahuluk mak ezame liuhusi online, signifika katak estudante sira ne’ebé durante ne’e ativu iha grupu online ba orisesu aprendizazen entre profesores ho estudante sira liuhusi telephone android bele ona tuir ezame online.
Opsaun daruak mak liuhusi ezame off line, signifika katak estudante sira ne’ebé la envolve iha prosesu aprendizazen online, ho rajaun laiha telephone android, sei fó posibilidade atu tuir ezame sumativu (ezame iha eskola) bainhira serka sanitaria ne’e remata ou sei buka tempu atu fó izame ba estudante sira ne’ebé mantein tuir regra serka sanitária.
“Ami iha opsaun rua hodi implementa ba estudante sira atu tuir ezame, iha online no mós off line no eskola sei la obriga atu tuir ezame onine,”tenik nia
Tuir dadus estudante sira iha eskola São Pedro Comoro, ensinu baziku estudante hamutuk na’in 686, no sekundaria estudante hamutuk 882.
Professor sira hamutuk na’in 49 kompostu husi professor permanente husi governu hamutuk 15, kontratadu husi governu na’in 7, partime na’in 3, professor husi eskola rasik iha na’in 24.
Aliende, iha mós tezoreiru-administrasaun-biblioteka na’in 5 no seguransa eskola nian hamutuk na’in 8.
Jornalista: Saturnina da Costa
Editor: Jose Sarito Amaral
