Ministru Edukasaun Juventude no Desportu (MEJD) Armindo Maia hatete, tuir lolos prossesu rehabilitasaun no konstrusaun eskola 197 hahú ona iha fulan Novembru, maibé to’o agora Ministériu finansas seidauk transfere orsamentu ba iha diresaun finansas munisipiu.
“Iha fulan dezembru hahú husi loron 1 ita hahú halo ona konstrusaun ba ita nia eskola 197 ne’e, tanbá ita hatene katak tuir lolos prossesu reabilitasaun no konstrusaun ne’e iha fulan ida ne’e, maibé Ministériu finansas seidauk transfere orsamentu ba iha diresaun finansas munisipiu , entaun ita muda fila-fali ba fulan dezembru,” dehan nia iha Palasiu Governu, kuarta horseik (24/11).
Iha sorin seluk, Koordenador Eskola Ensinu Basika Fillial Nu.2 Bebonuk, Tomas da Conçeição Soares hatete, kondisaun iha eskola refere, bainhira iha tempu udan, bee sempre tama eskola laran, tanba plafon sira komesa aat ona. Ho ida ne’e afeita tebes ba estudante sira bainhira hala’o hela prosesu aprendizajen.
Nia hatutan, fasilidade iha eskola refere hanesan, kadeira no meza mós balun aat ona, nune’e estudante sira hala’o prosesu aprendizajen tur deit iha rai.
Entretantu, molok ne’e, Diretór Nasional Infraestrutura no Edukativa, Hélio Lopes informa, eskola 197 ho nia sala aula 651 ne’e kompostu husi Munisipiu Aileu eskola 13 no sala aula 40, Ainaru 16 eskola no sala aula 51, Baucau 29 eskola no sala aula 92, Bobonaru 21 eskola no sala aula 76, kovalima 15 eskola no sala aula 49, Dili 16 eskola no sala aula 64, Ermera 18 eskola no sala aula 63, Lautem 16 eskola no sala aula 57, Likisa eskola 12 no sala aula 40, Manatutu eskola 9 no sala aula 29, Manufahi eskola 15 no sala aula 46 no Vikeke eskola 17 no sala aula 48.
Husi numeru eskola sira ne’e kada munisipiu ida sira koloka orsamentu ho montante mak hanesan iha munisipiu Aileu orsamentu hamutuk $1.313.542,97, Ainaru $1.569.735,27, Baucau $2.934.833,51, Bobonaro $2.409.512,03, Kovalima $1.612.455,32, Dili $1.680.680,12, Ermera $1.808.614,22, Lautem $1.702.312,60, Likisa $1.118.377,56, Manatutu $770.195,80, Manufahi 1.685.752,39 no Vikeke $1.668.575,18.
Asistente Editor: Saturnina da Costa
