Eskola 04 Setembru Seidauk iha Kaderneta Eskolár Featured

By Cesarina de Carvalho Marsu 28, 2024 255
Kaderneta Eskolar. Foto:Google. Kaderneta Eskolar. Foto:Google.

DILI: Diretór Eskola Ensinu Sekundáriu Jerál 4 Setembru, Martinho de Menezes, preokupa ba kaderneta eskolár ne'ebé oras ne'e seidauk iha ba estudante foun sira, tanba ezame trimestre dahuluk mós besik dadaun ona.

"Agora ezame trimestre dahuluk sei akontese iha 1 Abríl, maibé ami seidauk simu kaderneta foun ba ita-nia estudante foun sira 735, ita preokupa tebes," dehan diretór, iha knaar fatin, Tersa (26/03).

Nia hatutan, proposta ba preokupasaun hirak ne'e haruka ona ba Ministériu Edukasaun (ME) maibé seidauk iha resposta ba asuntu ne'e. Aleinde ne'e, husi númeru 735 ne'e, seidauk konta ho estudante désimu anu neʼebé la pasa iha tinan kotuk.

"Kaderneta ne'e kada tinan ita mak kálkulu, maibé ba tinan ne'e Ministériu Edukasaun mak halo kalkulasaun, ne'ebé deside ba ami Eskola 4 Setembru ne'e hamutuk 675. Ida ne'e la to'o tanba estudante ne'ebé la pasa barak liu, ida désimu anu iha 150 ba leten, nune'e mós ho désimu primeiru. Númeru ida ne'e liu ona kaderneta, uluk ne'e ita simu 1.000 ba leten," nia akresenta.

Hatan ba kestaun ne'e, Koordenadór Gabinete Unidade Kurríkulu Nasionál ME, João Maupelu, informa, ME prepara tinan ne'e atu distribui tan kaderneta eskolár 40.000 ba eskola ensinu sekundáriu jerál iha territóriu. Ne'ebé espera ESJ 4 de setembru mós iha hotu lista, tanba dadaun ne'e sei verifika mós ba dadus eskola ne'ebé atu simu kaderneta eskolár ne'e.

"Tinan ne'e hahú ona prodúz no hein kuandu kompleta mak ita distribui ba ensinu sekundáriu jerál sira iha Timor-Leste. Tanba tinan kotuk ita distribui ona 65.000, nune'e 40.000 ne'e ba estudante anu letivu 2024 nian de'it," nia informa.

Nia hatutan, sentru imprensaun imprime 40.000 ba kada nível eskolaridade, maibé ba ensinu tékniku vokasionál tinan ne'e sufisiente nune'e sentru imprensaun la imprime.

Rate this item
(0 votes)

Independente Digital TV

Tuir ami iha Twitter

Kalendariu Notisia

« April 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30