Ministru Administrasaun Estatal Tomas do Rosário Cabral hatete, projetu Dekretu lei ba eleisaun suku aprova ona no data ba eleisaun suku 28 fulan-Outobru tinan 2023, Asembleia sira sei hasoru malu hodi realiza eleisaun konsellu suku no mos delegada aldeia sira.
"Dekretu Governu aprova ona ohin, sei públika eleisaun suku no konsellu suku iha 28 fulan-Outubro no prosesu tomak ne'e sei hahú iha 13 Outubro no sei remata iha 25 fulan-Novembru tanba iha eleisoens ba aldeia, suku no konsellu suku no membru sira tomak, ita uza sei anterior ema ne'ebé hakarak kandidata an tenki hela iha suku aldeia bele kandidata an," dehan Ministru Iha Palasiu Governu, Kinta (10/08).
Entretantu, konsellu suku ne'e kompostu husi xefi suku, delegada aldeia, xefe aldeia, lia na'in no reprezentante juventude suku nian, sira ne'e hotu eleitu ba mandatu tinan hitu.
Rekorda katak, hafoin akta eleitoral sira ne'ebé realiza ona iha fulan-Outubru no novembru tinan 2016 ne'ebé hili ona lider komunitáriu atual sira, agora hahú prosesu eleisaun ba membru orgaun suku sira, ne'ebé sei asume responsabilidade durante periodu tinan 2023 to'o 2030.
Iha loron 13 fulan-Outubro tinan 2023, konsellu suku sira sei hasoru malu hodi estabelese meza eleitoral suku no hodi simu kandidatura xefe suku sira. Iha loron 28 fulan-Outubro tinan 2023, asembleia aldeia sira sei hasoru malu hodi realiza eleisaun delegada aldeia ba konsellu suku no xefe suku.
Ho nune’e, bainhira, la iha kandidatu xefe suku sira ida hetan liu metade husi votus validu ne'ebé hasai, asembleia aldeia sira hasoru malu, hodi realiza votasaun daruak iha loron 13 fulan-Novembro tinan 2023.
Konsellu suku sira hasoru malu iha loron 8 fulan-Novembro tinan 2023, hodi hili lia na'in no reprezentante juventude ho asentu iha konsellu suku nian.
Iha suku sira ne'ebé hala'o votasaun daruak hodi hili sira nia xefe suku, Konsellu Suku nian sei hasoru malu iha loron 23 fulan-Novembro tinan 2023 hodi hili Lia Na'in no reprezentante juventude ho asentu iha konsellu suku.
Entretantu, kalendáriu ida ne'e sei la aplika ba suku sira ne'ebé mandate husi sira nia lider komunitariu nian sei termina iha fulan-Abril tinan 2024.
