“Kresimentu ekonómika afetadu antes ona, la’ós de’it kazu Covid-19 akontese, ekonomia monu iha impase polítika. Ekonomia tuun ba porsentu ida (1%) iha impase polítika,” dehan nia, via telefone, horisehik.

Reitór ne’e realsa, problema ekonomia rai-laran monu seidauk konta tan akontesimentu inundasaun iha sidade Dili ne’ebé implika ekonómika totalmente.

Nune’e, nia dehan, pior liu-tan kona-ba kazu Covid-19 ne’e mak halo kresimentu ekonomia iha Timor-Leste grave liután.

"La’ós de’it dekreta Estadu Emerjénsia mak ninia impaktu ba setór ekonomia, tanba Estadu Emerjénsia forma ikus liu ona husi impase polítika no inundasaun," tenik Adolmando.

Nia reforsa, agora daudauk presiza haree kona-ba orsamentu ho montante tokon $150 ba prevensaun Covid-19 haree governu ninia progresu ne’e halo oinsá.

Adolmando esplika, governu kria lei ba distansiamentu sosiál, maibé depois membru governu balun deklara iha subsídiu maibé tenke prienxe kritériu.

Tanba ne’e, nia dehan, halo polítika iha fatin seluk depois dudu ema ba iha fatin risku no dehan atu prevene Covid-19 ne’e observa laiha lójika.