Tuir Defensór Públiku, Rui Guterres, ne’ebé fó apoiu asisténsia legál ba arguida hateten, faktu ne’ebé Ministériu Públiku akuza arguida ho krime tolu hanesan krime Pekulatu, aplika prizaun tinan 2, krime administrasaun neglijente kastigu fulan 6 no krime abuzu podér, prizaun tinan ida.
Maibé husi tipu krime tolu ne’e tribunál aplika pena úniku ba arguida ho pena prizaun tinan 3 suspensaun.
Nune’e mós defeza esplika, kona-ba osan indenizasaun, antes ne’e arguida devolve ona osan ho montante rihun rua nulu resin rua, atus hitu lima nulu USD $22.750 ba Estadu no sei deve ka seidauk fó hamutuk rihun rua nolu resin hitu, atus hitu, sia nulu, USD $27.790, ne’ebé tribunál fó prazu durante tinan rua atu entrega hotu.
Kuandu iha tinan rua nia laran, arguida Maria Isabel labele devolve osan restu ho montante rihun rua nulu resin hitu, atus hitu sia nulu USD $27.790 maka sei kumpre pena efetiva iha prizaun durante tinan tolu.
Enkuantu, kona-ba rekursu, defeza sei konfirma desizaun sira ne’e ba arguida, katak nia rasik aseita ka simu desizaun entaun la presiza halo rekursu, maibé kuandu la simu mak prazu loron 15 nia laran, parte defeza sei hato’o rekursu ba tribunál ne’ebé aas liu.
Arguida nia-deklarasaun ikus ba tribunál hato’o arrependimentu, liu-liu ba kazu ne’ebé komete hanesan kazu pekulatu no partisipasaun ekonomia no negósiu.
Antes ne’e, iha alegasaun finál Ministériu Públiku husu ba tribunál atu aplika pena prizaun Tinan ualu (8) no selu indenizasaun ba Estadu ho montante rihun neen resin ualu, atus haat, haat nulu resin rua USD $68.442.
Prokuradór, Jacinto Babo, konsidera arguida nia hahalok ne’e la administra no ezekuta orsamentu ne’ebé dispoin atu organiza prezensa Timor-Leste nian iha Expo Koreia, ho kuidadu no dilijénsia ne’ebé ezije kargu no osan públiku no bele kauza ba Estadu prejuizu ho montante rihun sia, atus ida ualu nulu resin neen USD $9.186 no gastu ba kustu produtu lokál kuaze rihun rua nulu resin ualu, atus haat neen nulu USD $28.460.
Totál fó prejuizu ba Estadu rihun neen resin ualu, atus haat rua nulu resin rua USD$ 68.422. Ministériu Públiku haree arguida viola nia-devér sira ho legalidade imparsialidade no boa administrasaun ba bens públiku tuir nia-guarda hodi hetan benefísiu ekonómiku ilejítimu ba Estadu.
Desizaun Tribunál nian prezide husi juis koletivu, Francisca Cabral, José Maria de Araújo, Maria Solana, Ministériu Públiku reprezenta husi prokuradór Jacinto Babo no arguida hetan asisténsia legál husi Defensór Públiku, Rui Guterres.
