Iha 30 Janeiru, horseik, tuku neen dader, eis manorin kontratadu na’in 80 resin hamriik iha estrada-ibun palasiu governu nia oin hodi hein prezensa husi Primeiru Ministru, Kay Rala Xanana Gusmão.
Maske nune’e, hein ba hein, lider ne’ebé sira tau esperansa boot ba ne’e la mosu iha sira-nia leet.
Portavós eis manorin kontratadu, Mariano Alberto Carlos hatete, sira-nia prezensa iha Palásiu Governu ne'e atu konfirma karta ne'ebé sira enkamiña ba gabinete PM Xanana iha loron 23 Janeiru 2025 ne’e.
Konteudu husi karta ne’e, eis manorin kontratadu sira husu atu halo audiensia ho Xefe Governu.
"Dadersan de'it ami iha Palásiu Governu ne'e ho objetivu atu halo komunikasaun ho Gabinete Primeiru Ministru kona-ba karta ne'ebé ami enkamiña ba iha Primeiru Ministru nia fatin iha Kinta semana kotuk ne'e.”
“Sira iha gabinete dehan karta ne'e sira simu ona maibé seidauk iha despaixu husi Primeiru Ministru atu hasoru ami,” dehan portavós ne’e, iha resintu Palásiu Governu, Kinta (30/01).
Sira hakarak atu halo audensia ho PM Xanana atu esklarese sira-nia sofrimentu ne'ebé durante ne'e sira sente, tanba Ministra Edukasaun, Dulce de Jesus, ho Sekretariu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos, la fó solusaun serteza ba sira-nia problema.
"Ami-nia audiensia ne'e hakarak ho Primeiru Ministru, ami hakarak esklarese sofrementu sa'ida mak ami hasoru husi 2023 até a data, tanba ami halo komunikasaun beibeik ona ho Ministériu Edukasaun no nia Sekretariu Estadu no halo dialogu beibeik ona maibé seidauk iha solusaun ida ne'ebé mak serteza. Ministra nafatin ignora beibeik ami, tanba ne'e ami hakarak liu husi fali dalan seluk ne'e mak hasoru Primeiru Ministru," nia dehan.
Foin lalais, Mariano dehan, ME fó ona opsaun atu sira tuir teste espesiál maibé sira rezeita tanba sira konsidera an hanesan funsionáriu ona.
"Ami rejeita teste tanba ami funsionáriu ona, ajente administrasaun públika. Ami ne'e serbisu ona iha Ministériu Edukasaun tinan barak. Ho ida ne'e mak ami rezeita tanba laiha lei ida mak atu regula tuir teste.”
Bazeia ba dekretu-lei númeru 31/2023, kona-ba Rejime Ingresu Espesiál, iha artigu 11 no 12 fó opsaun rua mak: Baixerlatu no lisensiatura tenke tama iha ingresu espesiál permanente no diploma sekundária sira hanesan ajente administrasaun públika, kontratu indeterminadu no tuir lei haruka nafatin serbisu hanesan administrasaun iha eskola sira.
Iha fatin hanesan, eis manorin husi Rejiaun Administrasaun Espesiál Oekusse-Ambeno (RAEOA), Rofina Noni hatete, molok ne’e ME bá munisípiu sira hatete problema eis manoris kontratadu ne'e rezolve ona, maibé realidade seidauk.
"Tanba ida ne'e mak ami mai atu kontinua husu ba Primeiru Ministru atu buka solusaun ba ami-nia problema."
Iha RAEOA, nia dehan, molok ne’e iha manorin kontratadu na’in 553 no na’in 264 mak tama iha ingresu espesial no restu la tama, maske avaliasaun dezempeñu serbisu di'ak hotu.
"Ami sente ida ne'e diskriminasaun boot ida ba ami, tanba antes iha loron 15 no 16 Janeiru 2024, husi Komisaun Funsaun Públika halo ona audiénsia ho ami no hatete ‘sira ne'ebé rejistu iha sistema signifika tama ona ba ingresu espesiál’, maibé realidade ami nafatin sai vítima," nia lamenta.
Eis manorin kontratadu seluk, Amália Rodrigues Ximenes hatete, sira-nia ezijénsia ba Primeiru Ministru mak oinsa atu buka solusaun ba sira-nia problema.
"Ami mai iha ne'e hakarak halo audiensia ho Primeiru Ministru, nune'e bele fó solusaun lalais ba ami-nia problema, tanba ami ne'e funsionáriu ajente administrasaun públika nian, la'ós kazuál, tanba ami iha númeru remis, payroll no seluk tan. Falta de'it ami-nia avaliasaun dezempeñu hodi rejista iha Funsaun Públika hodi tama ba ingresu espesiál, maibé Ministra Edukasaun, Dulce de Jesus, mak la autoriza profesór kontratadu sira-nia estatutu ne'e," nia dehan.
Eis manorin ne'e sente triste tanba nia maluk profesór rihun haat, ME hatama ona ba ingresu espesiál no elimina tiha sira maske termu kontratu hanesan.
