Enkuantu, ema ho defisiénsia matan ne’e, ho naran João Bareto ne'ebé hahú nia estudu iha Univesidade Nasional Timor Lorosa’e, iha tinan 2018, no hanesan mós estudante ba etapa dahuluk iha fakuldade siensia sosias departamentu inkluzaun sosial.
“Ami nuudar dosente orgullu, maske nia ho problema matan, maibé nia bele finaliza ninia hakerek ho letra braille. Hanesan milagre ida, tanba primeira-vez iha Timor-Leste, ema ho defisiensia matan ida bele hetan valor exelente iha ezame monografia hodi ba iha baxerlatu nian,”dehan nia ba jornalista sira, iha Kampus UNTL, Kaikoli, kinta horseik (22/09).
Nia dehan, iha departamentu inkluzasaun sosial ne’e, la'os de’it ba defisiénsia matan, maibé iha mós defisiénsia fiziku, hanesan ain no tilun. Iha etapa sira nian hamutuk ema na’in lima, ne’ebé atu ba iha baxerlatu.
Nia hatutan, sira ne'ebé kompleta ezame monografia sei kontinua avansa ba iha yudisium, hafoin graduasaun.
“Hanesan dosente haree ho matan ben, tanba EhD matan bele avansa, ne'e sai lisaun ba timoroan katak, EhD bele tanba sa ita labele,"tenik nia.
Iha fatin hanesan, Diretóra Departamentu Inkluzaun Sosial, Ceçilia Pereira, hateten, sira nia sistema valorizasaun ne’e hahú husi 85,5 ba leten hetan valor A, 84 mai kraik hetan valor B no 70 hetan valor C.
Ho nune’e, nia parte orgullu ho desizaun ikus, João Bareto nian ne’ebé hetan valor exelente ka A ho númeru 85,6.
“Primeira vez ami nia departamentu inkluzaun sosial marka historia tanba estudante ankatan baxerlatu ne’ebé ho kondisaun defisiensia tuir ezame, ne'e orgullo bo'ot,”nia dehan.
Nia hatutan, estudante universitariu iha departamentu inkluzaun sosial hamutuk na’in lima, husi sira ne’e, na’in tolu ba halo ona estajiu iha Munisipiu Ainaro, Ermera no Líkisa.
Entretantu, João Bareto, hatete, bainhira atu hakat ba tuir ezame monografia, ba dahuluk tenke domina ona relatorio sientifiku ne'ebé mak hakerek, atu nune’e bainhira aprezenta ba ezaminadór dahuluk to'o datoluk bele ho la’o diak hodi hetan valor di’ak.
"Ha'u kontente no haksolok tebes, durante ha'u nia prosesu aprezenta iha ezame monografia. Topiku ne'ebé foti husi relatoria sientifiku ne'e mak hanesan " promove talentu ema ho defisiensia matan liu husi programa artezenatu iha AHDMTL”.
