Ministru Dionísio konfirma ba Ministru Reforma Lejizlasaun Asuntu Parlamentár (MRLAP), Fidelis Magalhães katak, kondisaun saúde la premite, maibé iha loron hanesan Ministru Dionísio ba partisipa iha reuniaun inter-ministeriál ba preparativus adezaun TL ba ASEAN, iha Timor Plaza.

Ho hahalok ne’e maka Deputadu Parlamentu Nasionál konsidera Ministru Dionísio iha tendénsia atu boikota pose ba embaixadór sira ne’e.

“Ha’u preokupa! Ita haruka reprezentante nasaun nian ba ema nia rain, maibé ministru ne’ebé toma konta ba ida ne’e la marka prezensa, serake ida ne’e parte husi boikota malu ka halo nusa,” dehan Vise-Prezidente Bankada Partidu Demokrátiku (PD), Adriano Nascimento, iha Plenária, iha PN, horisehik.

Deputadu ne’e sente Dionísio Babo la hatudu imajen di'ak iha públiku, bainhira fó pose ba embaixadór sira ne’ebé pertense ba ministériu ne’ebé nia-lidera.

“Ha’u hakarak husu justifikasaun tanba saida mak ministru ne’e la marka prezensa iha serimónia tomada pose ne’e”, tenik nia.

Hataan ba kestaun ne’e, Ministru Reforma Lejizlativa Asuntu Parlamentár (MRLAP), Fidelis Magalhães deklara, hetan konfirmasaun husi Dionísio Babo katak, nia labele partisipa tanba la hetan konvite husi Prezidente Repúblika (PR), relasiona ho asuntu ne’e.

“Razaun prinsipál ne’ebé iha mak ministru ne’e la hetan konvite, aumezmu tempu ministru nia-kondisaun saúde mós ladún di'ak,” dehan nia.

Maski iha deklarasaun ne’e katak, Ministru Dionísio Babo ninia kondisaun saúde ladún di'ak, maibé iha loron hanesan Ministru Dionísio ba halo hela aprezentasaun kona-ba prosesu preparativus Timor-Leste nia adezaun ba ASEAN, iha Timor-Plaza.

Entretantu, informasaun ne’ebé diáriu ne’e hetan husi fonte besik Palásiu Prezidensiál katak, tuir regra protokolu Estadu nian bainhira Embaixadór ruma atu simu pose sempre iha koordenasaun no MNEK tanba sira maka sai na’in ba eventu ne’e.

“Antes ne’e koordenasaun entre Palásiu ho MNEK la’o hela. Tanba ne’e, iha serimónia ne’e hetan mós prezensa husi Sekretáriu Jerál MNEK no Xefe Gabinete Ministru Dionísio nian”, tenik fonte ne’e.

Koordenasaun ho MNEK Prezidente Repúblika, tanba ne’e Sekjer ho Xefe Gabinete MNEK mós ba partisipa serimónia pose ne’e.