Iha loron daruak asaun pasifiku kontra esbosu alterasaun difamasaun husi kodigu sivil ba kodigu penal, reprezentante manifestante sira koko atu fullow up akta ne’ebé sira hatama ona ba resepsionista Ministériu Justisa (MJ).

Maibé, parte resepsionista sira informa katak, Ministru Carceres laiha fatin tanba durante loron rua ona partisipa iha jornada orsamentu ne’ebé hala’o iha Ministériu Finansas, Aitarak-Laran, ho nune’e husu ba reprezentante manifestante sira atu halo de’it audensia.

Rona lia-fuan husi resepsionista ne’e, Koordenadór Kampu FMTL Noe Bernandino Ximenes, sujere atu hasoru-malu ho parte gabinete Ministru Carceres hodi determina tempu atu hasoru-malu ho MJ Carceres, no resepsionista husu atu ekipa ne’e hein lai.

Liu menutu balun, ekipa husi MJ ne’ebe reprezenta husi Adjuntu Diretór Polisia Sientifiku Investigasaun Kriminal (PSIK) Adino N. Cabral ba hasoru-malu ho reprezentante manifestante sira no husu de’it atu ema na’in tolu mak ba koalia ho sira.

“Imi ema intelektual, ha’u mós uluk ativista, husik na’in 3 de’it mak reprezenta imi ita ba kolia, restu hein iha ne’e de’it,” dehan Adino ho espertu.

Molok lori reprezentante manifestante na’in tolu, Adjuntu Diretór PSIK simu telefone husi ema balun no nia hatete: “Loos ona, sira mai ona iha ne’e, husik ami mak atende de’it sira”.

Molok lori ema na’in tolu ne’e ba, ekipa MJ halo pasa revista hodi prende hotu telefone.

Enkontru entre reprezentante manifestante na’in 3 ho ekipa MJ iha andar datolu edifisiu MJ, la’o kuaze menutu 30 nia laran. Teki-teki na’in tolu ne’e tuun mai ho oin kamutis no nakdedar, no koordenador kampu FMTL tuun ho matabeen.

“Ha’u tauk loos, ha’u trauma ho sira-nia ameasa ne’e. Sira haruka ita mai halo enkontru ho sira maibé laiha demokrasia,” dehan Noe ho nakdedar.

Noe konta, durante hala’o enkontru, ekipa MJ la fó tempu ba sira atu koalia, no bainhira sira koko koalia sira korta no trata.

“Ami la koalia, sira mesak mak koalia de’it. Ami kuandu koalia sira dehan ‘kar***… nonook, manggame ha’u sulan tiha imi iha sela’,” dehan Noe hodi repete ameasa no presaun ne’ebé sira simu durante enkontru ho ekipa MJ.

“Sira mak haruka ami ba laran mais sira iha laran tiha depois sira serku tiha ami ho isin ida boboot, depois ameasa ami, ne’e ami la brani atu koalia saida mak ami hanoin,” dehan Noe.

“Ha’u halo intervensaun sira dehan labele, depois sira ameasa atu baku ami, sira ameasa atu hatama ami ba iha sela durante oras 12.”

Iha fatin hanesan, Koordenador Kampu FMTL Werson Ribeiro afirma, durante enkontru, ekipa MJ halo de’it ameasa.

“Sira ameasa ami no sira baku meza ba ami. Ameansa atu baku ami, ida ne’e estraga ami nia pisikolojia. Inprisipiu, dialogu ne’ebé mak ami atu halo ne’e la akontese no ami la hato’o aspirasaun saida mak ami atu koalia,” dehan nia.

Hafoin ida ne’e, Kordenador Kampu FMTL Noe informa ba manifestante sira kona-ba saida mak akontese no no reafima tan pozisaun atu kontinua rejiste hodi kontra esbosu Kriminaliza Difamasaun.

“Kolega sira, aban ita kontinua nafatin asaun to’o hetan solusaun. Ameansa ne’ebé sira halo ne’e hatudu katak sira atu lori ita-nia estadu ba estadu feudal no totalitariu, seidauk aprova lei ne’e de’it mós sira ameasa ona ita, sa tan lei ne’e aprova, ita hotu la vale, ita ne’e animal ba sira. Ohin, ha’u-nia matabeen monu, aban ha’u prontu atu ha’u-nia ran fakar iha ne’e,” deklara Noe.

Entretantu, bainhira jornalista jornal INDEPENDENTE koko konfirma ho Adjuntu Direór PSIK, maibé nia lakohi fó komentariu, no nia eskoltu mós duni jornalista ne’ebé koko nafatin atu husu komentariu.