Dezde evakua ba iha Hotel Novo Turismo, iha Kinta (19/10) katak, to’o Sábadu (21/10), horisehik, deputadu opozisaun sira ne’e balun seidauk ba toba iha uma.

Funsionáriu Hotel Novo Turismo, ne’ebé lakohi temi naran, konta tuir katak dezde ba iha ne’ebá semana kotuk, deputadu husi bloku opozisaun AMP balun sei kontinua hela iha ne’ebá.

“Ha’u haree iha Sesta kalan no Sábadu kalan mós balun sei mai nafatin to'o ba iha ne’e”, dehan nia, iha Dili, Sábadu (21/10).

Nia hatutan, deputadu sira ne’e loron sira laiha, maibé kuandu tama ona ba lokraik sira komesa mai ida-idak.

Balun uza karreta prado mutin no metan maibé xapa matríkula oin kotuk hasai hotu. Balun fali ho karreta Triton, sira ne’e mak kalan-kalan iha ne’e.

Haree ba situasaun iha Parlamentu Nasionál, tensaun polítika provoka mós situasaun seguransa iha bairru balun Dili laran.

Maski nune’e, Sekretáriu Jerál FRETILIN, Mari Alkatiri, husu nafatin ba povu Timor tomak atu hakmatek hodi akompaña situasaun polítika nasaun nian.

Nune’e, Prezidente Bankada Partidu Demokrátiku (PD), Maria Tereza Gusmão hatete, situasaun polítika ne'ebé la’o iha parlamentu nasionál ne’e responsabilidade lideransa sira nian.

Tanba ne’e, ulun boot sira sei buka meius hotu oinsá bele entende malu hodi lori dezenvolvimentu ba povu no nasaun. Ne’e duni, husu ba povu tomak liu-liu ba militante no simpatizante partidu demokrátiku nian atu bele hakmatek iha ida-idak nia fatin hodi kontribui ba pás no estabilidade nasionál.