Deputadu husi Bankada CNRT, Carmelita Caetano Moniz hatete, iha 5 Janeiru 2021, Ministru Finansas Rui Gomes informa saldu tezouru ho total osan hamutuk tokon $325 hodi bele selu nesesidades kurtu-prazu nian, inklui deve sira.
Maibé, iha 23 Fevereiru 2021, tuir informasaun husi Banku Sentral Timor-Leste (BCTL) katak tranfere ona osan Fundu Petrolíferu hamutuk tokon $200.
Ho nune’e, nia dehan, total osan loloos hahú husi fulan Janeiru to’o Marsu 2021 hafoin konta ho levantamentu iha tinan 2021 hamutuk tokon $525, maibé hare’e husi ezekusaun to’o loron 17 Marsu gasta ona osan hamutuk $465,318,411.63. Signifika líquidez (saldo agora) hela de’it $59,681,588.37.
“Seraké iha fulan Marsu 2021 ida ne’e seidauk iha nesesidade atu halo levantamentu foun ba Fundu Petrolíferu ba OJE 2021? Tanba saldo agora hela de’it miliaun $59,7,” dehan Carmelita iha PN, Kuarta (17/03).
Tuir nia, konforme prátika di’ak kontabilístika internasional no Governu Timor-Leste uluk kedan implementa ida ne’e, orsamentu tranzita husi tinan passadu nian tenke rai tokon $200 ba iha saldu konta tezouru hodi asegura rezerva iha próxima ano nian. Osan ne’e saldu baziku iha kaixa tezouru tenke iha tokon $200.
Maibé, se hanesan ne’e, osan menus ona husi tokon $200, Governu tenke husu Banku Sentral atu transfere osan husi Fundo Petrolíferu ba iha kaixa tezouru nian.
Iha fatin hanesan, Prezidente Komisaun C, Maria Angélica Rangel dos Reis hatete, Governu foin halo levantamentu fundu petrolíferu iha 23 Fevereiru 2021 ho tokon $200.
“Ita-nia saldu likidus ne’ebé mak iha ita-nia tezouru atualizadu tokon $321. 2. Husi ita-nia tetu orsamentu husi 2021 $1.985 ne’ebé parlamentu nasionál aprova no Governu ezekuta ona iha primeiru trimestre ne’e hamutuk tokon $284,” dehan nia.
Maria Angélica dehan, iha lei fundu petroliferu mós dehan katak saldu mininu ne’e tokon $200 mak foin rekore ba iha levantamentu fundu petrolíferu.
“Maibé orsamentu jerál 2021 Governu halo ona levantamentu 23 Fevereiu tokon $200 no informa ona mai ami, no osan mai tiha ona agora uza dadauk no ezekusaun Governu nia to’o ohin atinze ona 19.5 pursentu husi OJE 2021,” nia informa.
Jornalista: Aquino Gomes
Editor: Jorjino dos Santos
