Durante halo servisu iha Uma Fukun PN hodi reprezenta povu, seidauk produs buat ruma ne'ebé fó benefísiu ba povu, maibé dala barak debate kona-ba interese partidu nian oinsa atu ukun.

Vise-Prezidente Bankada Partidu Demokrátiku (PD), Luis Mendes Ribeiro, rekoñese durante períodu fulan neen PN ne’e la produtivu, tanba deputadu sira la diskute interese nasionál nian, maibé ko'alia barak liu interese grupu partidária.

“Laiha produtividade servisu maibé saláriu la’o normál nafatin. Kada fulan ami sempre ba cheek osan iha banku tama ona seidauk, kuandu laiha ezije, maibé ezijénsia povu nian ami tau ona ba kotuk”, tenik nia, iha Uma Fukun PN, horisehik.

Nia hatutan, deklarasaun kona-ba ‘gaji buta’ ne’e mak kuandu deputadu balun la simu mai hatudu took saida mak nia durante produs ona dentru fulan neen nia laran.

“Ami nia saláriu báziku ne’e mil e tal (dolar amerikanu) aumenta ho regalia sira fulan ida bele liu tres mil (dolar amerikanu), funsionáriu ida ne'ebé nia saláriu mak liu fali ami nian?” dehan Luis.

Nia reforsa, tuir loloos ne’e deputadu sira tenke moe ona, la halo buat ida maibé kontinua simu saláriu. Maibé la hatene moe ona, tanba klamar semo sai hotu ona hodi bidu iha povu nia terus leten ho osan povu nian.

Prosesu sira ne’e akontese tanba mosu diverjénsia polítika entre bloku koligasaun no bloku opozisaun ne'ebé tama ona fulan neen, maibé la konsege solusiona situasaun polítika ne’e.

Iha fatin hanesan, deputadu Manuel Tomás Carvalho preokupa tebes ho situasaun iha PN ne'ebé kada fulan tau osan ba atividade fiskalizasaun nian, maibé komisaun espesializada hotu-hotu la halo nia knaar. Kada fulan osan fiskalizasaun ne’e deputadu sira kontinua simu.

Komisaun permanente sira ne'ebé estabelese kuaze opozisaun sira mak lidera, maibé to’o agora fiskalizasaun la la'o maski tau osan fiskalizasaun nian kada fulan.

Iha fulan ne’e nia laran ami husi komisaun E asuntu infraestrutura foin mak halo fiskalizasaun dala ida ba estrada Manu-meta Rai-Hun liga ba Dare.

Husi komisaun sira seluk balun mós ba halo ona fiskalizasaun, maibé seidauk liu dala rua ka tolu.

Nia hatutan, osan fiskalizasaun kada viajen ba deputadu sira $80 no ba kondutór sira $40 ne’e la ba fiskalizasaun mós sei simu nafatin.