Deputada PLP ne’e fahe nia esperensia katak, nia sosa foos ho marka Amor da Familia karon tolu hodi koko foos refere iha kualidade ka lae.

Bainhira nia tein foos refere, Angelina dehan, foos la tasak didi’ak, no maske tau bee barak foos refere la dodook no namkari hanesan rai-henek.

"Entaun ida ne'e ita fó osan husi orsamentu fundu petroliferu atu fasilita ita-nia povu ne'ebé mak labele asesu ba foos folin ne'ebé karun maibé ita fó fali foos ne'ebé mak kualidade la di'ak, i bele dehan rai ona iha tempu naruk i nia atu tasak ne'e defisil, ne'e ami kestiona no lamenta tebes," dehan Angelina iha PN, Tersa (14/11).

Dala-ruma, tuir nia, governu mak laiha monitorizasaun regular tanba governu so tau tiha subsidiu ba kompaña mak jere, no governu marka pasu ba kotuk.

“Governu mak tenke jere tanba ne'e osan publiku, i tenke kontinua monitoriza posesu distribuisaun foos sira ne'ebé governu subsidia ona atu bele hatene nia andamentu no progresu sira iha merkadu ne'e to'o iha ne'ebé,” dehan nia.

Aleinde kualidade, Deputada Angelina informa, iha semana ikus ne’e tuir ninia observasaun iha terenu, folin foos ne’ebé empreza sira fa’an seidauk tuun.

"Foos sira ne'ebé mak la hetan subsidiu signifika foos sira ne'ebé hetan ona subsidiu ne'e (folin) normal ona, ne'e par sira bele iha kompetisaun ho foos ne'ebé mak la hetan subsidiu hanesan foos globus AAA, Folsom sira ne'e, mais sira bé hetan subsidiu ne'e tanba sa to'o agora governu la chek didi'ak nia presu ke nafatin as," dehan nia.

Iha fatin hanesan, Xefe Bankada CNRT Duarte Nunes hatete, nia parte konkorda ho deputadu sira ne’ebé kestiona problema foos, tan ne’e husu ba Ministériu Komersiu no Industria atu responsabiliza.

"Kona-ba kestaun foos ne'e ha'u konkorda, karik membru governu sira naton mai ne'e favor ida responsabiliza ba situasaun ne'e tanba ita mai hatan malu iha ne'e ho hanoin katak ita rezolve problema ne'e, maibé sei rasta nafatin problema ne'e iha ne'ebé?," dehan nia.

Molok ne’e, Ministru Komersiu no Industria, Nino Pereira hatete, governu kontinua akompaña hodi halo monitorizasaun ba folin foos ne'ebé governu subsidia ona atu labele mosu manipulasaun ba folin.

"Ita sei kontinua ba monitorizasaun karik iha faktus, dadus ruma ne'ebe sira (komsumidór) hetan bele aprezenta, tanba ita lakohi buat ida espekulasaun presu foos, ida ne'e mak negosiante sira tenke hasees an tiha," dehan nia ba jornalista sira iha Suai Room, Timor Plaza, Tersa (07/11).

Bainhira komunidade sira hetan loza balun manipula folin foos subsidiu bele hato’o keixa ba Aifaesa, MKI, no CCI-TL atu governu bele foti medida.

Daudauk ne’e, nia dehan, foin kompaña rua husi kompaña lima ne’ebé governu fó subsidiu mak distribui foos.

Enkuantu loza kuaze 200 no individu sira ne’ebé loke kioske kuaze 100 mak hahú fa’an ona foos subsidiu.

Bainhira hetan manipulasaun folin foos subsidiu, nia afirma, presiza hato’o keixa no aprezenta mós ho dadus balun no manipulasaun ne’e halo husi loza ka kioske ida ne’ebé no iha postu ne’ebé.