Iha 11 Janeiru, dadus husi Ministériu Saúde hatudu katak kazu dengue ne’ebé rejista hamutuk 262. Enkuantu iha 12 Janeiru kazu ne’e sa’e ba 344. Signifika iha loron ida nia laran iha ema na’in 88 mak tama ospital tanba sofre moras dengue.

Tuir komunikadu imprensa husi Departamentu Vijilansia Epidemolojia, husi total kazu 344 kazu barak liu iha Dili ho kazu 272, Manatuto kazu 20, Kovalima kazu 15, Ermera kazu 13, Manufahi kazu 13, Vikeke kazu 4, Ainaro kazu 3, Likisa kazu 2, Aileu kazu ida no Bobonaro kazu ida.

“Einjeral daudauk ne’e total munisipiu 10 mak rejista ona kazu dengue, nune’e haree kazu kada loron kontinua aumenta, ba númeru obitu laiha, sei mantein ho kazu lima ne’ebé antes fó sai,” informa MS liu husi komunikadu ne’ebé jornal INDEPENDENTE asesu, Kuarta (12/01).

Iha munisipiu Dili, postu administrativu ne’ebé rejista kazu as mak Dom Aleixo ho kazu 113, Kristu Rei kazu 58, Vera Kruz kazu 51 no Na’i feto kazu 46.

HNGV Nakonu

Maske kazu dengue transfere ba sentru internamentu Vera Kruz, maibé Hosptiál Nasionál Guido Valadares (HNGV) kontinua hasoru problema espasu atu halo atendimentu ba pasiente sira.

“Hakarak hato'o katak ita-nia over load iha ospitál sei nafatin de'it, maske pelumenus ita minimiza ona sira balun ba iha internamentu Vera Kruz,” informa Diretor Klinika HNGV, Alito Correia, iha nia knaar fatin, HNGV, Kuarta (12/01).

Nia dehan, kondisaun ida ne’e mosu tanba HNGV ne’ebé loloos halo de'it tratamentu tersiaria ne'ebé ligadu ho tratamentu espesialidade ninian, maibé pratikamente sira ne'ebé loloos bele hetan tratamentu iha fasilidade halai ba hotu HNGV.

“Ida ne’e mak fó impaktu ba HNGV, kazu sa'e makas iha fulan ikus tinan 2021 nian tama to’o Janeiru tinan ne'e,” nia hatutan.

Atu evita ida ne’e, nia dehan, HNGV sei halo screening ba pasiente sira, liu-liu pasiente dengue ne’ebé mai halo tratamentu.

“Sira mai direitamente ita sei halo screening hafoin haree sira ne'ebé kritika, persiza espesialista sira-nia atendimentu mak ita haruka mantein iha ne’e, maibé sira ne’ebé moderadu haruka liu ba Vera Kruz,” nia dehan.

Entretantu, daudauk ne’e pasiente dengue ne’ebé halo tratamentu iha Vera Kruz hamutuk na’in 55.