Tuir observasaun husi jornalista jornal INDEPENDENTE iha Bairo Formoza nota katak, maizumenus tuku 14.15 oras Timor-Leste, karreta militar rua hakbesik an ba rezidensia Angela. Karreta ida halai liu, enkuantu karreta ida seluk ho sapa matrikula F-FDTL 234 para no membru Falintil Forsa Defeza Timor-Leste (F-FDTL) na’in 4 ne’ebé uza uniforme militar, lori arma no taka oin, tuun husi karreta.

Hafoin, na’in rua la’o ba hamriik iha kurzamentu estrada besik otel Luzklarita, na’in rua seluk hamriik kurzamentu besik Sentru Saúde Formoza, enkuantu na’in 4 seluk tuur nafatin iha karreta laran.

Membru F-FDTL hirak ne’e kontinua hamriik iha sira-nia fatin to’o maizumenus tuku tuku 16.00 OTL, hafoin sira sa’e fali ba karreta hodi husik hela fatin.

Maibé, hafoin menutu hirak tuir mai, karreta F-FDTL rerefe halo hikas movimentu ba-mai iha diresaun Bairo Formoza.

Bainhira jornalista sira konfirma ho Angela via telefone, portavoz RNDJ-KRDTL ne’e dehan, daudauk ne’e nia laiha uma, maibé nia rona informasaun katak membru F-FDTL ba iha nia uma atu kaptura nia.

"Ha'u agora dadaun laiha fatin, tanba sira (membru F-FDTL) konsentra iha ne'ebá dehan atu halo kapturasaun, ne'ebé karik halo kapturasaun ami sempre kopera, tanba ami la halo krime, tanba ita hotu akompaña katak durante ne'e ami halo buat sira ne'e tuir hotu prosesu, ne'ebé ami hetan ona legal husi PNTL par atu akompaña ami-nia manifestasaun," dehan Angela.

Maibé maizumenus iha tuku 18.00, karreta pajero metan ida para iha Sede Nasionál RNDJ-KRDTL no Angela mós tuun husi karreta laran hodi bolu jornalista sira ne’ebé hein hela nia no realiza konferensia imprensa.

Liu husi konferensia imprensa ne’e, Angela dehan, prezensa membru F-FDTL iha Bairo Formoza atu asegura seguransa.

“Prezansa Forsa Defeza iha ne’e, ha’u sente seguru, tanba foin lalais ne’e loron rua liu ba festa ida iha salaun Luzklarita, besik sede rezistensia, barullu ne’ebé rezulta motor rua sunu no mós karreta rahun, tanba neduni sira-nia operasaun agora dadauk la’o ne’e atu asegura estabilidade, F-FDTL hamutuk ho PNTL atu asegura seguransa liu tan,” dehan Angela.

Kona-ba deklarasaun husi Maijor Jeneral Lere Anan Timur ne’ebé ameasa atu futu nia, Angela hili atu la halo konfrontu no hatete de’it katak nia tenke respeitu hanoin husi Lere.

“Ha’u hanoin katak saida mak Lere koalia nia rasik hatene katak situasaun presiza duni ekilibrasaun, tanba ne’e duni ita rasik mak tenke interpreta tuir ita-nia matenek nune’e labele halo propaganda baratu atu prejudika ou barailla situasaun,” dehan nia.

Tuir nia, propaganda baratu ne’ebé mosu ho intensaun atu prejudika ka barailla situasaun, nune’e bele impede fali asaun pasifiku ne’ebé sei organiza husi RNDJK.

“Ami determina ona loron 4 (Setembru) asaun la’o, maibé aban (ohin) ami sei iha enkontru iha Kuartel Jeral PNTL sei konbina ho Komandante Jeral, tau hanoin hamutuk nune’e determina oras saida mak atu komesa,” dehan nia.

Entretantu, tuir observasaun jornalista INDEPENDENTE, hafoin konferensia imprensa husi Angela, karreta F-FDTL kontinua halo movimentu ba-mai iha area Bairo Formoza.

Molok ne’e, iha Kuartel Jeneral F-FDTL, Fatuhada, Dili, Segunda (31/08), Xefe Estadu Maior Jeneral Falintil Forsa Defeza Timor-Leste (F-FDTL) Maijor Jeneral Lere Anan Timur deklara, sei la husik grupu RNDJ-KRDTL atu hatuun PR Lú Olo.

Sa tan, tuir Lere, portavoz RNDJ-KRDTL Angela Freitas mak ‘lasu’ Maijor Alfredo Reinado no Mauk Moruk to’o sira na’in rua mate.