Porta Voz Sentru Integradu Jestaun Krize (SIJK) Doutór Rui Maria de Araújo hatete, dadus kumulativu konfirmadu pozitivu Covid-19 mantein na’in 24, laiha kazu foun, total kazu rekuperadu na’in 20 kompostu husi na’in 16 konfirmadu no na’in haa (4) provavel.

“Total kazu konfirmadu ne’ebé sei iha izolamentu iha Vera Cruz na’in 8, total kumulativa hein rezultadu laboratóriu na’in 73,”dehan nia liu husi konferensia imprensa, iha CCD, ohin.

Nia informa, ema ne’ebé halo ona teste laboratóriu nia rezultadu negativu hamutuk 622, halo ona teste laboratóriu hamutuk 719.

Total ema ne’ebé sei iha konfinamentu obrigatóriu hamutuk 253 kompostu husi Dili 169 no iha munisipiu 38 no ema ne’ebé halo auto karantina 46 iha munisipiu sira.

Ema ne’ebé liu ona konfinamentu durante loron 14 hamutuk 1979 kompostu husi Dili 1559 no iha munisipiu 420.

Husu ba komunidade atu kumpri nafatin protokolu husi Organizsaun Mundial Saúde (OMS) nian kuidadu nafatin ijiene pessoal fase liman bebeik mantein distansiamentu sosial nomós distansiamentu fíziku. Hakmatek iha uma kuandu la iha nesesidade ne’ebé importante iha li’ur. Sai ba li’ur tenke uza maskara.

Nia mós informa katak wainhira iha sintomas infesaun respiratória aguda (IRA)  hanesan isin manas, kakorok moras, me’ar, inus-been, ruin kiik- bo’ot siin halo favor ba konsulta iha sentru saúde ka ospital sira. Se lakohi atu hetan moras Covid-19 ne’ebé grave ka krítiku hapara fuma sigaru no hemu tua.