Porta Voz Sentru Integradu Jestaun Krize (SIJK) Doutora Odete Viegas da Silva hatete, kuarta-ohin suspeitu na’in 36 maka hatudu negativu tan ona kompara ho dadus tersa-horisehik suspeitu na’in 289 hein rejultadu teste laboratóriu.

“Dadus kumulativu ema ne’ebé halo teste laboratóriu hamutuk 1.533, ema na’in 253 sei hein rezultadu no ema na’in 1.256 nia rezultadu negative,”dehan nia liuhusi konferensia imprensa iha CCD, ohin.

Nia informa, ema na’in 44 sei iha kuarentena obrigatóriu, iha Dili hamutuk 38 no iha munisipiu neen (6). No ema na’in 43 iha auto-kuarentena, iha Dili hamutuk 43 no iha munisipiu lima (5).

Ema ne’ebé liu ona loron 14 iha kuarentena hamutuk 2.250 kompostu husi Dili 1.750 no iha munisipiu 500.

Nia mós apela ba públiku katak maske Timor-Leste laiha ona kazu foun durante semana tolu maibé nafatin kumpri regra husi Organizasaun Mundial Saúde (OMS) mantein distansiamentu sosial no fíziku, kuidadu ijiene pessoal fase liman bebeik no uza maskara bainhira sai husi uma.