Porta Voz SIJK, Doutór Rui Maria de Araújo hatete, kazu konfirmadu mantein 24, total rekuperadu mós nafatin 22, no pasiente ne’ebé sei iha izolamentu na’in neen (6).

Total ema ne’ebé halo ezame laboratóriu 922, ema ne’ebé hatudu rezultadu laboratóriu negativu hamutuk 781.

Ema ne’ebé sei iha kuerentena 99 kompostu husi Dili 68 no iha munisipiu 28, ema ne’ebé halo auto kuerentena iha Dili tolu.

Total ema ne’ebé liu ona loron 14 iha kuerentena hamutuk 2.162 kompostu husi Dili 1686 no iha munisipiu 476.

Husu ba komunidade atu kumpri nafatin protokolu husi Organizsaun Mundial Saúde (OMS) nian kuidadu nafatin ijiene pessoal fase liman bebeik mantein distansiamentu sosial nomós distansiamentu fíziku.

Hakmatek iha uma kuandu la iha nesesidade ne’ebé importante iha li’ur. Sai ba li’ur tenke uza maskara.

Nia mós informa katak bainhira iha sintomas infesaun respiratória aguda (IRA) hanesan isin manas, kakorok moras, me’ar, inus-been, ruin kiik- bo’ot siin halo favor ba konsulta iha sentru saúde ka ospital sira. Se lakohi atu hetan moras Covid-19 ne’ebé grave ka krítiku hapara fuma sigaru no hemu tua.