Tanba ne’e, CNRT fiar katak Xefe Estadu sei fó posse ba membru Governu foun husi partidu FRETILIN, PD no KHUNTO tuir ninia perfil (meritu) no hotu-hotu moos husi kazu.

“Agora ita mós hein, oinsá mak Primeiro Ministru no Prezidente Repúblika sei haree mós ba kestaun perfil husi ema sira iha lista, tantu FRETILIN nian komu KHUNTO nian,  atu halo parte iha Governu foun ne’e,”dehan Segundu Vise-Prezidente Partidu CNRT, Virgilio Smith, iha Sede Partidu CNRT, Bairu Grilhos, Segunda (11/5).

Tuir CNRT nia haree katak mosu manobra no arranju polítiku sira, husi partidus tolu, FRETILIN, partidu istóriku, PLP (Partidu Libertasaun Popular) no KHUNTO, ne’ebé consider an nuudar partidu hadomi povu.

Virgilio dehan, atu kompleta VIII Governu ne’ebé Primeiru Ministru hatudu ba públiku, ba hotu membrus husi partidu FRETILIN, ida mak ba Partidu Demokratiku (PD).     

“Partidu CNRT la hakfodak bainhira haree katak pasta ka fatin sira ne’e, desde uluk kedas, iha Juñu 2018,  ‘pertense por direitu’  ba membrus CNRT, ne’ebé Prezidente Repúblika lakohi nomeia no la fó posse ho razaun katak iha kazus pendentes iha Tribunal no la tuir ‘perfil’,”nia akresenta. 

Ho razaun sira, iha reuniaun Komisaun Diretiva AMP nian, tinan 2018 ho 2019, bainhira husu kona-ba problema Prezidente Repúblika la nomeia no la fó posse, Primeiru Ministru hatán hela deit

“Ha’u baku meza, ha’u baku meza”, kala to’o liman moras tiha hodi Primeiru Ministru nonok de’it ona,”nia  hatutan.

Tanba ne’e, CNRT husu tuir lista foun ne’ebé Primeiru Ministru aprejenta ba Presidente Repúblika atu fó posse ne’e.

Lista ne’e, Prezidente Repúblika mak sei haruka ba Ministériu Públiku no Tribunál Rekursu atu konfirma sira iha kazu pendentes ka la’e.