Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Dr Rui Maria de Araújo hatete, Kazu konfirmadu hirak ne’e iha mane na’in 46 no feto na’in 24.
“Husi total kazu foun na’in 70, na’in 4 mak iha sintomatiku no na’in 66 asintomátiku ka lahatudu sintomas,”dehan nia iha konferensia imprensa, iha CCD, (09/04).
Nia esplika, evulusaun iha Munisipiu Dili, deteta kazu foun 53. Nune’e kazu detetadu ka pozitivu iha Munisipiu Dili husi 7 marsu 2021 to’o ohin 9 abril 2021 hamutuk 742.
Ho baze ba informasaun ne’ebé disponível, ekipa konjunta saúde hafo fali revizaun ba fokupropagasaun/cluster iha Munisipiu Dili ho baze ba ligasaun entre kazu iha área geografika no expozisaun ba fonte infesaun.
Ho nune’e iha Dili re-organiza cluster tuir área geografika suku nian ho fatin propagasaun seluk mós, hamutuk hotu iha 23 cluster.
Munisipiu Baucau ohin deteta tan kazu foun 1. Kazu positivu hirak ne’e ba husi Dili. Hamutuk hotu iha Baucau iha kazu 35 detetadus.
Ho baze ba informasaun ne’ebé disponível, ekipa konjunta saúde hafo fali revizaun ba foku propagasaun/cluster iha Municipiu Baucau ho baze area geografika. Total iha cluster 4 iha Baucau mak hanesan Baucau vila, Venilale, Laga no Quelecai.
Ohin iha Munisipiu Manatuto deteta kazu foun 1. Kazu ida ne’e halo viajen husi Dili.
No iha Munsipiu Covalima deteta tan kazu positivu 13. Kazu positivu hirak ne’e halo viájen husi Dili iha loron 7 abril.
Munisipiu Lautem deteta tan kazu pozitivu 2. Kazu hirak ne’e iha kuarentena iha Lospalos.
Entretantu dadus jeral ba loron ohin (09/04) Kazu foun na’in 70 (53 iha Dili, 17 iha Munisipiu seluk), kazu rekuperadu na’in 48 no kazu ativu ne’ebé hela iha izolamentu hamutuk na’in 515.
Jornalista:Saturnina da Costa
Editor:Jose Sarito Amaral
