Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Rui Maria de Araujo hatete, kazu foun ne’ebé relata ohin iha mane na’in 114 no feto 117.
“Sira ne’ebé ho idade 12-59 detetadu positivu iha na’in 225 hanesan ho pursentu 97,4 no idade 60 ba leten na’in 6. Nune’e propurasaun kazu sintomatiku hamutuk pursentu 11,6,”dehan nia liu husi komunikadu (26/05).
Ho nune’e, dadus jeral ba loron ohin iha kazu foun 231, kazu rekuperadu 158 no kazu ativu iha sala izolamentu no auto-izolamentu hamutuk 2,739.
Komulativu kazu konfirmadu sura husi loron 21 fulan-Marsu tinan 2020 to’o loron 26 fulan-Maiu tinan 2021 hamutuk 6,245.
Husi horseik (25/05) mai ohin (26/05) teste PCR ne’ebé halo iha Dili hamutuk 1,283, ne’ebé kompostu husi Vijilánsia sentinel 13, Contact tracing 87, Random Screening 215, Viájen sai husi serka sanitária husi Dili 819, Viájen internasionál 122 no Follow up iha kuarentena 27.
Totál testes PCR ne’ebé halo horiseik (25/05) iha Munisipiu sira seluk, RAEOA no HNGV hamutuk 603 ho detalle hanesan tuir mai, Baucau 120, Ermera 15, Maliana 61, Maubisse 85, Suai 129, Vikeke 34, RAEOA 16 no HNGV 143.
Entretantu, Izolamentu Vera Cruz ohin, halo tratamentu ba kazu detetadu hamutuk 38.
Asistente Editor: Saturnina da Costa
