Informasaun ne’e mosu tanba lider másimu AMP, Kay Rala Xanana Gusmão, ne’ebé mós nu’udar Prezidente Partidu CNRT, ladún kontente ho valór orsamentu ne’ebé governu propoin.

Tuir fonte ne’ebé besik bankada CNRT hateten, husu ona ba Governu atu hamenus valór orsamentu ne’e, maibé karik kontinua ‘ulun toos’ hodi mantein númeru ne’e maka laiha dalan seluk, Bankada CNRT vota kontra.

La’ós ne’e de’it, razaun seluk orsamentu labele konvense Bankada CNRT maka OJE 2020 nian la estruturadu la tuir ninia verba.

“Maun boot la konkorda ho orsamentu ne’ebé governu propoin la tuir ninia estrutura loloos”, dehan fonte ne’e.

Orsamentu ne’ebé loloos tau aloka ba kapitál dezenvolvimentu governu propoin fali ba transferénsia publika.

Situasaun ne’e la’ós foin, antes ne’e, bainhira sei iha rai li'ur, Xanana Gusmão husu atu redús Orsamentu Jerál Estadu (OJE) tinan fiskál 2020.

“Maun boot-nia pedidu maka hamenus OJE 2020. La aseita sobu governu”, dehan fonte ne’e haktuir pedidu Xanana nian.

Tanba ho ameasa ne’e, maka governu mós konkorda ona hodi hamenus OJE 2020 liu husi proposta alterasaun iha debate Parlamentu Nasionál, oin mai.

Nune’e, orientasaun Xanana nian hetan konkordánsia husi bloku governu iha Parlamentu Nasionál ne’ebé hakarak atu redús OJE 2020 entre biliaun $1.3 to’o biliaun $1.6.

Antes ne’e, iha PN deputadu bloku AMP rasik mós fó kritika. Deputada Bankada CNRT, Virgínia Ana Belo, hahú loke kritika bainhira Ministra Finansas interina, Sara Lobo Brites, aprezenta OJE 2020 iha PN. La'ós ne’e de'it, deputada ne'e mós ameasa vota kontra.

“Ha'u husu orsamentu sira ne'e tenke muda ba hotu tuir nia fatin, se laiha mudansa ha'u vota kontra orsamentu, ha'u la aseita tebes kuandu orsamentu tinan oin ne'e montante biliaun $1,95,” dehan Virgínia.

Pozisaun husi deputada ne'e afirma husi deklarasaun Deputadu seluk husi Bankada CNRT, António de Carvalho ne'ebé hatete, nia foti ona pozisaun atu vota kontra OJE 2020 bainhira la redús montante OJE 2020.

“Ami mós deside ona katak tenke halo redusaun maibé governu mak lakohi halo redusaun hodi mantein nafatin agora daudaun ne'e mak orsamentu jerál estadu 2020 nian sei la pasa,” deklara deputadu ne'e iha PN, Segunda (11/11).

Tuir membru Komisaun E ne'e, estandarte loloos ba alokasaun orsamentu iha OJE mak biliaun $1.3 to’o biliaun $1.4.

Liga fila fali deklarasaun deputadu Bankada CNRT ne'e ho deklarasaun Prezidente Bankada CNRT, Duarte Nunes bele hatudu sinál balun ba pozisaun Bankada CNRT nian.

Duarte dehan, bankada CNRT sei haree no analiza ezekusaun OJE 2019 molok foti desizaun kona-ba OJE 2020.

“Ita-nia lista pendente laiha ligasaun hodi vota kontra OJE 2020 maibé bele mós iha ligasaun tanba karik ita haree kapasidade ezekusaun, durante ne'e ita hotu preokupa dehan Ministru la kompletu mak afeta ba ezekusaun orsamentu,” dehan Duarte.

Maski nune'e, nia hatete, iha plenária PN deputadu sira ida-idak mak sei foti desizaun hakarak vota a favór, kontra ka abstensaun.

Deputada Bankada KHUNTO Olinda Guterres konsidera montante OJE 2020 boot demais. Tan ne'e husu atu haruka fila fali ba governu hodi redús.

Aleinde montante osan ne'ebé boot, deputada Olinda mós preokupa kona-ba kapasidade ezekusaun tanba membru governu ne'ebé seidauk kompletu.

Deputadu Bankada PLP Sabino Soares Guntur hato'o mós kritika ba OJE 2020 tanba konsidera OJE ba tinan oin sai nu'udar OJE ne'ebé komplikadu no la tuir estrutura tanba tau arbiru de'it.