Diretór Ezekutivu CNC, Hugo Maria Fernandes hateten, CNC fó apoiu liuhusi Asosiasaun Vítima no Konflitu hodi harii uma ba sobrevivente sira, husi konflitu pasadu nian, liuliu ba sira neebé tama iha kategoria torturasaun, vítima violénsia seksual no seluk tan.
“Konstrusaun uma ba memória esperansa iha aldeia ne’e, no programa ne’e tama liu ba iha reparasaun ne’ebé tuir lei internasionál tenke sai obrigasaun estadu nian,” dehan nia, iha Aldeia Nahaek, Dare, segunda horseik (11/10).
Nia hatutan, CNC hanesan instituisaun estadu nian halo hela obrigasaun estadu nian liuhusi apoiu ne’e, ho ida ne’e uma ne’ebé atu konstrui ne’e ho medida 9x12 ho nia orsamentu hamutuk rihun US$ 14.
Nia informa, benefisiáriu ne’ebé sira konstrui uma ne’e ho naran Duarte Agostu da Silva no Luiza Fátima de Sousa ho sira nia oan hamutuk nain 4, mane 1 no feto 3.
Iha fatin hanesan, Koordenadór Ezekutivu Nasionál Asosiasaun Vítima Konflitu Polítiku 1974-1999, Domingos Pinto “Atai” hateten, munisípiu sira seluk sei iha prosesu verifikasaun, tanba uma kain 11 neebé agora daudaun atu harii nee sira identifika ona iha tinan 2020, no uma sira nee ho nia medida 7X9 husi uma kain 10 no uma ida mak nia medida la hanesan ho sira seluk, tanba la prenxe dezeñu entaun nia medida 5X6 no kada uma ho nia orsamentu US$ 14.000 no uma ida mak liu US$ 7.000.
Entretantu, Xefe Aldeia Nahaek, Augosto Soares hatete, tinan barak ona mak sira hein programa Governu nian, ne’ebé atu ajuda maluk sobrevivente sira, nune’e, ohin loron konsege realiza duni.
“Tinan barak ona ami hein programa ida ne'e, tanba ami nia komunidade sira ne'ebé ho vuneravel presiza tulun, ami nuudar autoridade lokal laiha kbiit no forsa atu tau matan ba ami nia komunidade ne'ebé vuneravel,”tenik nia.
Tanba ne’e, nia agradese ba CNC ne’ebé ho laran luak ajuda ona komunidade ba vitima sobrevivente iha Aldeia refere.
Enkuantu, Luiza Fatima hanesan benifisiariu husi kontrusaun uma esperansa ne’e, agradese mós ba CNC ne’ebé bele ajuda harii ona uma ba nia ho familia.
Asistente Editor: Saturnina da Costa
