Prezidente BTL,E.P, Carlos dos Reis hatete, daudaun ne'e Governu iha ona prosesu aprovizionamentu atu esplora bee imediata iha tempu badak ba komunidade iha aldeia rua nee tanba hetan ona aprovasaun.

"Laiha dalan seluk ita halo imediata atu kanaliza bee ba sira iha tempu badak. Agora ita esplora hela tanba ha'u aprova ona atu halo lansamentu iha tinan ne'e,” Nia hateten iha kna'ar fatin Kaikoli (04/09).

Esplorasaun dada bee ba aldeia rua ne'e, iha fatin rua, ida iha parte Kamea no ida iha Ai-lele hun.

Bainhira rekursu bee laiha, difísil atu dada, liu-liu ba komunidade ne'ebé hela iha foho leten, maibé Governu sempre buka alternativa hodi bele resolve.

"Agora ita halo esplorarasaun bee husi rai-okos, ne'e iha parte ne'ebá iha posu rua. Bainhira  iha ita bele uza hodi fornese ba komunidade iha área ne'e," nia dehan.

Kualkér preokupasaun husi komunidade sempre iha solusaun, tanba bee-matan ne'ebé iha fatin nee la sufisiente atu tau bomba hodi dada bee moos.

Nune'e, komunidade presiza pasiénsia oitoan hodi hein prosesu ne'ebé oras-ne'e lao hela tanba iha posibilidade tempu besik atu dada bee moos.

Husu mós ba komunidade atu labele tesi ai arbiru tanba fó impaktu makaas ba bee matan sira ne'ebé iha foho leten.

La Hatene Sistema Kanalizasaun iha Dili

BTL,E.P la hatene sistema kanu Bee Moos ne'ebé monta ona iha kapitál Dili, tanba sistema kanu bee ne'ebé monta iha rai okos durante tempu Indonézia, ate agora barak mak tékniku sira la hatene no susar atu jere bee ba komunidade iha tempu bailoron bainhira bee hahú menus.

"Kanu sira ne'e halai ba ne'ebé dalaruma ita-nia ema sira mós la komprende. Entaun, ita ulun moras oitoan kuandu kanu kuak, bee sae ba rai leten, ne'e diak maibé sai ba rai kuak ne'e ita la hatene," Carlos dos Reis hateten.

Bainhira iha tempu udan, bee sufisiente ba komunidade, maibé dalaruma balun estraga  tanba bee débitu tun iha tempu bailoron naruk.

Ho ida nee, maka, atu troka sistema tuan ne'e Governu planeia ona katak, iha longu prazu mak projetu dada bee husi Glenu mai Dili.

Sei normaliza Bee iha Manleuana

Parte BTL,E.P,  sei normaliza hikas sistema kanalizasaun Bee Moos iha aldeia haat ne'ebé pertense ba suku Manleuna, postu administrativu Dom Aleixo, Munisípiu Dili.

Iha posibilidade Governu sei mantein hadia sistema kanu bee ne'ebé hetan estragu totál husi inundasaun iha 04 abríl tinan nee.

"Ha'u orienta ona tékniku-sira, ho opsaun rua katak, posibilidade bele hadia sistema tuan atu komunidade bele asesu, maibé iha foho leten ne'e hanesan análiza hidraulik bele dada ka lae ita dada bee bele ba foho leten," Carlos dos Reis, hateten.

Bainhira tékniku-sira nota opsaun rua nee, ida neebé mak diak bele implementa nune'e bele rekopera fila fali sistema.

BTL,E.P mós deskobre katak, iha komunidade balun husi aldeia haat nee fura bee illegal, hodi fasilita malu ba nesesidade loro-loron.