Tuir komunikadu ne’ebé Online INDEPENDENTE asesu iha pajina Portal Governu, segunda ne’e, haktuir katak, Estudu ne'e avalia opsaun prinsipál dezenvolvimentu haat, hanesan Gas Natural Liquefied Timor-Leste (TLNG - Gas Natural Liquefete husi Timor-Leste), Darwin LNG (DLANG), Ichthys LNG no instalasaun foun LNG iha Australia. Opsaun hotu-hotu tékniku konsidera viavel, ho sira-nia risku asosiadu maibé ekivalente.
Opsaun TLNG ne’e subliña liu husi provizaun kustu operasionál menus (OPEX) no liu husi fasilidade atu halo retornu jerál, direta no indireta ne’ebé di’ak liu ba Timor-Leste, sei kria impaktu sosio-ekonomiku boot ida ba nasaun ne’e.
Opsaun ida ne’e mós fó impaktu pozitivu bo’ot liu ba Produtu Brutu Internu (PIB) no kriasaun empregu, nune’e mós retornu bo’ot liu ba Konsorsiu Dezenvolvimentu Greater Sunrise (Sunise Joint Venture). Tuir estudu ne’e, TLNG mós bele hetan retornu diretu di’ak liu ba Austrália.
“Wood, ho esperiénsia boot iha estudu sustentabilidade gás naturál globál, uza rekizitu rigorozu hodi análize enjeñaria, teknolojia, finansiamentu, estrutura komersiál sira, nune’e mós impostu, ambiente, saúde no seguransa, no impaktu sosio-ekonomiku sira,”Haktuir komunikadu ne’ebé Online INDEPENDENTE sita, (23/12/24).
Primeiru Ministru Timor-Leste no Austrália, Kay Rala Xanana Gusmão no Anthony Albane, iha deklarasaun konjunta ida ne’ebé fó sai iha loron Sabadu (21/12/24), afirma fila fali kompromisu nasaun rua ne’e nian atu asegura katak dezenvolvimentu kampu Greater Sunrise nian iha Timor-Leste lori benefísiu ba tempu naruk ba povu Timor-Leste,”.
“Atu apoia Timor-Leste nia aspirasaun atu asegura kreximentu ekonómiku ba tempu naruk, hadi’a modelu moris no diversifika ninia ekonómia, Australia hakarak halo investimentu signifikativu iha futuru Timor-Leste liu husi estabelesimentu fundu infraestrutura ida-ne’ebé dedikadu, ne’ebé kapitalizadu husi parte balun husi Australia nia parte iha futuru reseita projetu Great Sunrise nian,” tenik komunikadu refere.
Entretantu, Xefe Governu husi nasaun rua ne’e hanoin katak “sira hein atu asina inisiativa signifikante sira ne’e iha tinan oin mai, hanesan hatudu husi kompromisu nasaun rua ne’e nian iha dezenvolvimentu Greater Sunrise no hametin relasaun bilaterál”.
Enkuantu, Ministru Prezidensia Konsellu Ministrus, Porta Vós Governu Agio Pereira, iha diskusaun sira kona ba Greater Sunrise, hateten katak “konkluzaun estudu ne’e nu’udar enkuadramentu fundamentál ida ne’ebé konfirma viabilidade dezenvolvimentu Greater Sunrise nian iha Timor-Leste.
Nune’e, solusaun hirak ne’e lori benefísiu ne’ebé signifikativu no sustentavél ba povu Timor-Leste no konsolida potensialidade ekonómika país nian.
“Ami sei kontinua servisu besik ho ami-nia parseiru sira hodi implementa vizaun ida-ne’e,”.
Enkuantu, kampu gás Greater Sunrise nian iha tasi-ibun Timor-Leste nia parte súl besik 140 km. Konsorsiu ne’ebé responsavel ba dezenvolvimentu kampu Greater Sunrise (Sunrise Joint Venture) no kompostu husi Timor GAP, ne’ebé kaer 50.6%, Woodside, ho 33.44%, no Osaka Gas Austrália, ho 10%.
