Komandante Operasaun PNTL Munisípiu Dili, Superintendente Assistente Polísia Luis Amaral hatete, Polisia bolu Eugénio bazeia ba keixa formal ne’ebé hato’o husi SEATOU.

“SEATOU halo keixa kona-ba ninia atividade iha Sesta kalan atu hapara bar no diskoteka sira ne’ebé loke múzika ho lian boot iha Formoza. Depois, señór Eugénio tau postajen iha média sosiál no bolu asaun ne’e hanesan bandalizmu tanba sobu diskoteka sein notifikasaun. Tan ne’e mak ami bolu nia mai presta deklarasaun kona-ba kronolojia postajen refere,” dehan Luis iha Kaikoli, Segunda (25/05).

Nia esplika, karik Eugénio la satisfaz ho maneira servisu SEATOU nian, bele halo keixa formal atu bele analiza no hadi’a servisu Estadu nian.

“Karik la satisfaz, bele halo keixa formal. Ida ne’e la’ós ami-nia kompeténsia direta, tanba ami servisu tuir orden ne’ebé iha. Ohin ami bolu señór Eugénio tanba iha keixa husi SEATOU,” nia afirma.

Iha parte seluk, Eugénio Sarmento defende katak durante ne’e Governu buka dalan atu dezenvolve no hadi’a sidade Dili, maibé iha mós buat balun ne’ebé halo komunidade la satisfas.

Nia konsidera asaun SEATOU hasoru diskoteka ‘Agua de Coco’, ne’ebé nia oan-feto nia negósiu, nu’udar atuasaun ilegal tanba laiha notifikasaun molok ba sobu.

“Tuir loloos, SEATOU tenke bolu ka ko’alia uluk ho na’in bar nian, esplika objetivu no husu lisensa. La’ós tama bainhira ema sira hemu hela depois sobu direta de’it sein koñesimentu husi uma-na’in. Ne’e mak ha’u bolu bandalizmu,” Eugénio dehan.

Nia akresenta katak membru Governu tenke hatudu etika no respeitu ba komunidade molok halo asaun ruma.

“Parte ida bandalizmu tanba etika laiha. Hanesan membru Governu ida, tenke respeita ema ki’ik sira antes halo asaun,” nia hatete.

Eugénio hatutan, ninia indignasaun aumenta tanba iha ema balun uza maskara no akompaña ekipa SEATOU bainhira halo operasaun sobu ekipamentu múzika nian.

Nia mós revela katak ninia oan-feto foin partu fulan rua, no akontesimentu derepente ne’e halo família asustadu.

“Ha’u-nia oan tanis telefone ha’u tanba asustadu ho akontesimentu ne’ebé mosu derepente no la espera,” nia dehan.

Maski rekoñese katak nia sala tanba la hato’o karta formal ba SEATOU no prefere públika diretamente iha Facebook, Eugénio insiste katak ninia objetivu la’ós atu ataka ema partikular.

“Ha’u orgullu SEATOU nia líder ne’ebé tegas halo servisu. Maibé karik iha sala, ita tenke hadi’a. Ida ne’e mak ha’u-nia objetivu,” nia hatete.

Aleinde ne’e, Eugénio afirma katak nia família prepara ona keixa formal ida atu submete ba Ministériu Públiku hasoru SEATOU.

“Ami la’ós de’it ba hatan iha polísia. Ami mós prepara ona karta ba Ministériu Públiko tanba ita hotu iha lei nia okos,” nia dehan.