Diretór Ezekutivu Bobolait.Lda, Carlito Pereira hatete, empreza to’o agora hein de’it orientasaun husi konsultan no entidade relevante sira.
“Projetu ida ne’e la’ós kompaña mak abandona. Ami hein orden servisu. Se agora laiha orden servisu, ami atu ba halo saida? Servisu balun ami remata ona, falta de’it item rua,” dehan Carlito ba jornalista Jornál INDEPENDENTE, iha nia knar fatin, Segunda (25/05).
Tuír nia, item rua ne’ebé seidauk remata mak konstrusaun estatua memorial no dalan tama ba rate sira iha área Santa Kruz.
Nia dehan, dezeñu estrutura estatua memorial prepara ona, maibé to’o agora seidauk hetan aprovasaun final husi ADN no Obras Públikas. Enkuantu ba dalan tama, problema boot mak iha rate balun ne’ebé lokaliza iha área ne’ebé sei halo asesu ba monumentu.
“Ami kompaña labele sobu ema-nia rate. Instituisaun ne’ebé iha kompeténsia mak tenke halo desizaun kona-ba ne’e. Depois mak kompaña bele kontinua servisu,” nia dehan.
Carlito husu atu entidade responsavel sira, inklui Komite 12 Novembru no PAM Dili, buka solusaun hamutuk kona-ba relokalizasaun rate sira ne’ebé impede dezenvolvimentu projetu.
Nia mós rejeita alegasaun katak Bobolait.Lda simu ona osan tomak maibé abandona servisu.
Tuír nia, pagamentu ne’ebé kompaña simu bazeia de’it ba volume servisu ne’ebé realiza ona.
“Se progresu 10%, ami tagih 10%. Se 20%, ami tagih 20%. To’o agora ami foin simu besik 36% husi projetu ida ne’ebé total osan to’o millaun $1 resin,” nia esplika.
Carlito afirma katak Komisaun Anti Korrupsaun (KAK) dala-barak ona mai halo verifikasaun ba projetu ne’e, maibé empreza kontinua koopera tanba sente katak la halo violasaun ida.
“KAK mai ona dala-barak, maibé ami la halo krime ida. Pagamentu hotu tuir volume servisu. Ami la haan osan projetu ne’e hanesan akuzasaun balun dehan,” nia hatete.
Relasiona ho planu halo estatua memorial iha Portugal, Carlito hatete, folin estatua refere aas liu kontratu orijinal, ne’ebé halo ADN seidauk foti desizaun final.
“Patung ne’e planu atu halo iha Portugal no folin to’o millaun $1.9, liu kontratu atual. Ne’e mak halo prosesu ne’e para hela to’o agora,” nia hatutan.
Maski hasoru kritika, Carlito insiste katak Bobolait.Lda kontinua prontu atu halo servisu bainhira hetan orden no kondisaun tekniku hotu kompletu ona.
Molok ne’e, Komisariu Komisaun Anti Korupsaun, Rui Pereira dos Santos deklara, KAK daudauk ne’e halo hela akompañamentu ba implementasaun projetu konstrusaun Monumentu Memoriál Masakre Santa Kruz iha terenu no bainhira identifika indisius krime, sei prosesa ba Ministériu Publiku (MP).
“Monumentu Memoriál Masakre Santa Kruz ne’ebé kompaña Bololaid Unipesoal Lda ezekuta ho osan millaun ida ne’e atraza tebtebes, nune’e KAK sei haree, bainhira iha indísiu krime, KAK prosesa kompaña Bololaid Unipesoal Lda,” dehan Komisariu KAK, Rui dos Santos, iha knaar fatin, Faról, Sesta (22/05).
KAK, nia dehan, bele uza artigu kona-bá fraude konstrusaun no krime seluk ne’ebé previstu iha Lei nú. 7/2020 atu lori kazu refere ba prosesu legal no eventual kondensaun ba parte ne’ebé sala.
Projetu Jardim Memoriál Masakre Santa Kruz, nia dehan, daudaun sai ona objetu atensaun husi KAK relasiona ho kualidade no ezekusaun projetu fíziku.
Rui hatete, projetu ne’e la’o durante mandatu governu daualu, no bazeia ba deklarasaun husi Ministru Asuntu Kombantente Libertasaun Nasionál, Gil ‘Oan Soru’ katak estatua ba memorial ne’e halo iha Portugal ho valor kontratu hamutuk rihun $300.
“Osan $300,000 uza hotu tiha maibé estatua seidauk mai. Ita atu halo saida? Tanba ema ne’ebé viola ne’e la’ós ema iha rai laran, maibé ema rai li’ur,” Rui hatete.
Tuir nia, problema ne’e envolve parseiru kompaña iha rai li’ur, nune’e presiza kooperasaun entre setór justisa sira atu bele halo investigasaun kona-bá osan ba estatua.
