Peter Thompson, dezignadu hanesan Asesór Investimentu Estratéjiku ba Prezidente Repúblika (PR), José Ramos Horta, no Hendrik Halbe, Bilionáriu Kapitál Risku nian, Fundadór eskola negósiu no empreendedorizmu nian iha Olanda.

Vizita ne’e realiza tuir orientasaun husi PR Horta, no PM Xanana, ne’ebé uluk simu tiha ona delegasaun refere iha enkontru sira ne’ebé liu ona.

"Liu husi orientasaun Primeiru Ministru no mós Prezidente Repúblika nian haruka sira na’in rua mai hasoru mós ha’u," dehan Vise PM Kalbuadi Lay, iha Farol, Tersa (07/04).

Iha enkontru ho Vise PM, diskusaun foka ba oportunidade sira atu promove investimentu, dezenvolvimentu rekursu umanu no kooperasaun ekonómiku entre Timor-Leste ho parseiru internasionál sira.

"Peter, iha relasaun besik ho Prezidente Repúblika durante tinan 20 resin, hatudu nia interese atu kontribui ba dezenvolvimentu Timor-Leste, liuliu iha área investimentu no kapasidade rekursu umanu," dehan Kalbuadi.

Iha diskusaun ne’e mós, parte rua ko’alia kona-bá inisiativa atu harii forum negósiu entre Timor-Leste no Amérika iha tempu oin mai.

Alénde ne’e, ko’alia mós asuntu ambientál no mudansa klimátika, ne’ebé parte internasionál sira hatudu interese atu fornese apoiu finanseiru, tuir diskusaun téknika sira ne’ebé sei kontinua iha etapa tuirmai.

Tuir Vise-PM, Hendrik Halbe hatudu nia intensaun atu harii instituisaun edukasaun superiór iha Timor-Leste. Molok implementasaun, parte rua sei halo estudu no diskusaun atu fasilita programa formasaun ba Timoroan sira iha Olanda, liuliu iha área ospitalidade, otelaria no área profisionál seluk.

Inisiativa ne’e mós inklui oportunidade ba péritu internasionál sira atu mai fó formasaun iha rai-laran, no fasilita mobilidade ba kuadru Timoroan sira hanesan jerente no supervizór atu hetan esperiénsia no edukasaun iha Europa.

"Hendrik mai atu harii eskola universidade mas antes ida ne’e ami sei diskute hela atu haruka ema lobuk ida ba halo treinamentu iha área oioin iha Olanda, iha área Ospitalidade, Otelaria no seluk tan. Bele sira-nia péritu sira mai hanorin iha ne’e (Timor) nune’e mós hanesan level manager, supervisor sira, ami bele haruka ba eskola iha Olanda," dehan nia.

Nune'e mos, Peter Thompson sente kontente tanba Timor-Leste simu sira ho di’ak.

"Ami mai iha ne’e hodi diskute kona-ba dezenvolvimentu ekonómiku Timor-Leste nian", haktuir Peter Thompson.

Entratantu, Hendrik Halbe, hatutan, sira mai ko’alia ho Governu Timor-Leste oinsa bele fó oportunidade ba timoroan sira ba tuir formasaun iha parte jestaun no negósiu nian.