Transmisaun lokal ba kazu pozitivu Covid-19 hahú deteta iha inisiu Marsu 2021, hafoin buka tuir kontatu-besik ba kazu pozitivu ida ne’ebé deteta iha munisipiu Baukau. Kazu dahuluk deteta iha area BTN II, Tasi Tolu.
Hafoin ida ne’e, transmisaun lokal hahú mosu iha suku sira seluk iha kapital Dili, no kazu dahuluk iha Bebonuk deteta iha aldeia Metin 4 iha 8 Marsu, no liu loron ida, iha 9 Marsu deteta kazu pozitivu iha aldeia 20 Setembru, Bebonuk.
Númeru kazu pozitivu iha aldeia 20 Setembru hahú sa’e beibeik, no to’o horseik, tuir relatoriu husi SIJK, iha kazu 50 mak deteta iha aldeia refere.
Husi númeru ne’e, signifika suku Bebonuk kontribui númeru kazu pozitivu boot liu, hamutuk kazu 51, husi total kazu 197 ne’ebé deteta iha kapital Dili.
“Bebonuk konsidera hanesan Zona Vermelha,” deklara komunikadu husi SIJK ne’ebé jornal INDEPENDENTE asesu, Tersa (23/03).
Tuir informasaun husi SIJK, iha 23 Marsu 2021, deteta tan kazu pozitivu 15. Kazu 9 deteta iha aldeia 20 Setembru, Bebonuk, kazu 3 husi Aldeia Bidau Toko Baru II, kazu 1 husi iha Aldeia Kakeu-laran, no kazu 1 iha Aldeia Mota-klaran.
“Kazu detetadu pozitivu iha Munisipiu Dili husi loron 7 fulan Marsu 2021 to’o ohin, loron 23 fulan Marsu ne’e, hamutuk hotu 197, kazu detetadu ne’e fahe ba cluster 35, ne’ebé namkari iha instituisaun 4, eventu 1, Suku 10, no fatin kuarentena 1, iha Postu Administrativu Dom Aleixo, Vera Kruz, Na’i Feto no Kristu Rei,” informa Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo liu husi Konferensia Inprensa, Tersa (23/03).
Enkuantu, ba evolusaun surtu Covid-19 iha munisipiu Vikeke, Rui hatutan, Ekipa Vijilansia Saúde deteta tan kazu foun 2. Ho nune’e kazu ne’ebé deteta iha Vikeke hamutuk 10.
Kazu foun hirak ne’e hela iha Aldeia Umaneiku, Suku Ossu de Sima, Postu Administrativu Ossu.
“Kazu konfirmadu hirak ne’e kontatu-besik ho kazu ne’ebé deteta iha fatin hanesan,” dehan nia.
Ba Munisipiu Baukau, Lautem no RAEOA, Rui dehan, la deteta kazu pozitivu foun.
“Kazu foun ohin hamutuk na’in 16, kazu rekoperadu laiha no kazu ativu oras ne’e sa’e ona ba pasiente 227,” nia dehan.
