Koordenador Sentru Evakuasaun Real Madrid Manleuana João Abrão Tane, hatete, durante fulan-ualu nia laran sira hela iha sentru evakuasaun, iha bebee na’in 17 mak moris iha fatin refere.

“Bebee na’in 17 ne’e, moris uluk iha na’in 15 no tuir mai iha tan na’in rua,”dehan nia ba Online, iha sentru evakuasaun Manleuana, Dili, kuarta ne’e.

Nia esplika, total familia afetadu ne’ebé sei hela iha sentru evakuasaun kampu Real Madrid Manleuana hamutuk uma-kain 48. Ema hamutuk 264, kompostu husi mane na’in 147 no feto na’in 117, inklui mós labarik ho idade tinan 1 to’o 17 iha na’in 120.

Entretantu, inan ne'ebé fó susu bebee hamutuk 17 no labarik husi idade 1 to’o 5 hamutuk 35, kompostu husi feto na’in 14 no mane 21.
Aleinde ne’e, labarik ho idade tinan 6 to’o 17 hamutuk 85, kompostu husi feto 35 no mane 51, no mós inan isin-rua hamutuk na'in 4.

Enkuantu, vitima inundasaun ne'ebé hela iha lona okos kada uma-ka'in ida kompostu husi ema na'in 12.

Iha fatin hanesan, inan isin-rua Esperança Gonçalves, hatete, ho kondisaun ne’ebé isin rua, nia senti la seguru bainhira nafatin hela iha lona okos.

Nia hatutan, agora dadaun tama ona ba tempu udan, nune’e bainhira udan tau, udan been sempre kona sira, tanba lona ne’ebé sira hela bá balun komesa nakles ona.
Tanba ne’e, vitima sira husu ba Governu atu resolve problema hirak ne’ebé sira infrenta.

Inundasaun akontese iha loron 4 fulan-Abril tinan 2021.

Asistente Editor: Saturnina da Costa