Tuir informasaun, bebe ne’e hetan isin manas ba halo tratamentu no baixa iha sentru saúde Formoza, nune’e muda fali ba Óspital Nasional Guidu Valadares (HNGV) iha loron (31/05), hafoin loron hirak nia laran mediku sira halo teste Swab ba bebe no nia inan-aman.
Husi rezultadu teste hatudu, bebe nia inan-aman hetan positivu, no bebe hetan rezultadu negativu.
Tuir observasaun husi jornalista INDEPENDENTE haree katak bebe ne’e hahú ohin (04/06) iha oras tuku 4 madrugada tanis makas to’o tuku 6 dader no bebe nia liman-ain to’os hotu.
Tanba ne’e, aman husi bebe, ba bolu médiku sira atu haree bebe nia kondisaun maibé mediku sira lamai.
“Iha dadersan kedas ami ba bolu sira maibé taka fali odamatan no lasai mai atende ami iha liur,”dehan bebe nia aman ba Jornalista iha Sala Izolamentu Vera Cruz, sesta ohin.
Hafoin, iha oras tuku 12:15 meudia inan husi bebe ba bolu sikuriti atu koalia ho mediku, maibé sikuriti ne’e mós la fó atu konfirma ho médiku sira.
Ho situasaun ne’e, halo pasiente sira seluk iha Izolamentu senti triste no sai ba hakilar, hafoin liu minutu 30 mediku sira lori jelu fatuk mai kompras ba bebe, maibé ladiak nafatin.
“Hau nia oan nia liman-ain to’os hotu ona, nia tanis deit atu halo oinsa, médiku hirak ne’e sai mai lori deit Jelu fatuk hodi kompras maibé ladiak nafatin,” tenik bebe nia inan.
Hanesan inan-aman, rekomenda ba Ministeriu Saúde liuliu mediku sira atu tau matan ba pasiente sira ho dignu, tanba pasiente iha izolamentu Tasi-Tolu mediku sira ladun kontrola no atende pasiente sira.
Entretantu, oras ne’e to’o kalan ona seidauk iha Mediku ida mai hare fali bebe nia kondisaun.
Ho nune’e, familia sira husu atu muda fali ba halo tratamentu iha HNGV.
Asistente Editor: Saturnina da Costa
