Molok ne’e, mosu deklarasaun ‘pesimista’ husi eis Prezidente Autoridade RAEOA José Luis Guterres kona-ba ro Haksolok, tanba tuir nia kompaña ne’ebé governu kontrata atu konstrui ro lulun biti ona.

"Ró atu mai Timor-Leste ne'e só Maromak nia tulun karik, maibé ba ita hanesan ema baibain ne'e defísiil," dehan José Luis iha 10 Juñu 2020.

Governu, tuir José Luis haruka tiha ona osan tokon $20 ba konstrusaun ro Haksolok no kompaña husu tan osan tokon $13 atu kompleta. Maibé, nia dehan, lei orsamentu no jestaun finanseira la fó dalan.

Maibé, PA RAEOA Arsenio Bano ne’ebé troka José Luis, mosu ho konfiansa.

Arsenio iha esperansa katak katak ró haksolok sei mai Timor-Leste iha tinan 2021.

“Ha’u espera, sim, katak tinan 2021 ha’u hein katak ró ne’e bele mai to’o, tempu mak sei haree osan sei presiza tan ka lae,” dehan Arsenio Bano iha hafoin partisipa abertura ba sesaun datoluk iha lejislativa V Parlamentu Nasional, Tersa (15/09).

Arsenio hatete, daudauk ne’e nia parte sei haree no estuda kontinuasaun situasaun ro Haksolok.

“Iha mós kondisaun balun, inlui empreza privada husi reziaun kontinua halo segimentu ba ró Haksolok,” dehan nia.

Nia parte, PA RAEOA ne’e hatutan, husu nafatin apoiu husi governu sentral no eis PA RAEOA Mari Alkatiri atu oinsa ró ne’e bele mai TL.

“Ha’u fiar karak situasun ne’e under control (kontroladu) no ami husu nafatin apoia husi governu sentral no doutor Mari Alkatiri tanba sira mak hatene liu situasaun ró Haksolok,” katak nia.

Maske rekoñese kompaña ne’ebé konstrui ro Haksolok lulun biti ona, maibé autoridade RAEOA ne’ebé reprezenta estadu tenta kaer metin nafatin ró ne’e mai Timor-Leste.

“Krize ne’e la’ós ita-nia kontrolu maibé akontese iha Portugál, kompaña mós akompaña nune’e autoridade Oekusse, ZEESM, no governu sentral asegura nafatin (ro) mai Timor-Leste,” dehan nia.