Vise Prezidente Bankada PLP, Francisco de Vasconcelhos hatete, aktu Prezidente PN ne’e hanesan tentativa ida atu hamosu krize institusional hodi bele hakat ba eleisaun antesipada.

“Prezidente Parlamentu Arão Noe nia hahalok ida ne’e hatudu momoos tentativa atu paraliza Parlamentu Nasional hodi labele funsiona ho normal,” deklara Vasconcelhos liu husi konferensia imprensa iha sala bankada FRETILIN, Kuarta (06/05).

Deputadu PLP ne’e hatutan, Arão Noe nia hahalok no inkapasidade ida ne’e hatudu mós katak nia ho nia partidu tenta atu provoka krize institusional ida, tanba hakarak atu ezekuta deklarasaun ne’ebé prezidente CNRT halo tiha ona atu lori Timor-Leste ba eleisaun antesipada dala ida tan.

“Ne’e hanesan ironia boot ida, tanba sira hakarak atu lori Timor-Leste ba fali eleisaun antesipada iha momentu ida ne’ebé povu no estadu enfrenta hela dezafiu global surtu virus corona foun”.

Ho razaun ne’e, Vasconcelhos hatete, deputadu husi bankada tolu hato’o rekerimentu ba destituisaun Prezidente PN ho intensaun atu PN bele funsiona normal fila fali hodi hala’o serbisu ba estadu no povu to’o mandatu remata.

Tuir rezimentu PN, Vasconcelhos dehan, iha loron lima nia laran Prezidente PN tenke tau ba ajenda rekerimentu destituisaun ne’ebé aprezenta.

Tan ne’e, bainhira la tau iha ajenda ho durasaun tempu ne’ebé iha, Bankada tolu sei husu Vise Prezidente PN hodi lidera halo votasaun ba substituisaun Prezidente-PN foun, atu nune’e Parlamentu Nasionál labele mamuk.

“Kuanda iha orgaun ida vise prezidenete ne’e hatudu katak Prezidente PN kuandu laiha, Vise PN bele assume reponsabilidade. Tanba iha Timor laiha ema ida insubtitutivu  ida, ita labele halimar ho estadu tuir ita-nia hakarak, estadu labele lao ho ida ne’e,” nia dehan.

Ba kestaun ne’e, Prezidente Bankada CNRT, Duarte Nunes hatete, nia parte seidauk haree razaun fundamentu husi Bankada tolu hodi hatama pedidu substuisaun meza PN.

“Sira husu nia fundamentu sira ne’e, depois Prezidente PN mak foin tetu hodi  haree, depois mak fó hatene par haree situasaun sira ne’e, tanba ha’u seidauk haree no lee sira-nia karta ne’e, espera katak iha fundamentu ruma, maibé ita lee tiha sira-nia karta mak foin hatene,” dehan nia.

Entretantu, Jornalista tenta atu konfirma Prezidente PN, Arão Noe de Jesus Amaral, maibé nia parte lakohi fó komentariu ba asuntu ne’e.