"Ha'u hanesan inan, karik ha'u sei la hatan labarik fa'an sasan iha dalan ninin, maibé tanba iha buat balun ne'ebé mak ita nia Intitutu Direito da Criansa sira mós foti hela, entaun, mai tenke tur hamutuk atu haree, se karik ami probidu sira ba iha ne'ebá saida mak bele halo," dehan nia ba Jornalista sira iha knar fatin, kuarta horseik (30/03).
Tanba ne'e, parte Autoridade Munisipiu Dili sei servisu hamutuk ho Institutu Defeza Direito das Criansa atu halo identifikasaun ba labarik sira neebé faan sasan iha dalan ninin,
hodi bele haruka ba inan-aman sira atu nune'e bele kontribui redus numeru trabalho infantil iha Timor-Leste.
"Ami tenke identifika, purezemplu ida, labarik A ka B nia inan aman ne'e se?, nia inan aman ne'e iha duni ema kbi'it laek ka lae? ou nia inan-aman iha buat ruma, maibé labarik sira mak hakarak fa'an sasan,"nia esplika.
Ho nunee, Prezidente Autoridade nee apela ba komunidade no inan-aman sira atu tau atensaun no asegura labarik sira ne’ebé hakarak osan rasik, liu-liu iha lampu merah sira, sira tama ba kareta le'et husi ida ba ida, ne'e perigu ba sira nia vida.
Entretantu, molok nee, Prezidente INDDICA, Dinorah Granadeiro, hatete, traballo infantil problema ne'ebé kompleksu tebes, tanba ne'e presiza lei espesifiku atu bele fó poder ba sira halo atuasaun ba individu no pesoal koletiva ne'ebé halo explorasaun ba labarik sira.
"Ami komisaun dalaruma hakarak ba foti labarik sira ne'e, lori fila ba sira nia familia, maibé ami hetan difikuldade tanba laiha lei espesifiku ne'ebé koalia asuntu ida ne'e. Entaun bele kria polemika iha sosiedade nia leet no ita lakohi atu kombate labarik sira nia involvimentu faan sasan ou trabalho infantil, ita kria fali forma seluk ba familia sira. Tanba ne'e ita hakarak rezolve situasaun ida ne'e, maibé labele fó situasaun ne'ebé ladiak ba familia mós no atu realiza ida ne'e ita tenke mai ho baze legal," dehan nia hafoin simu tomada de posse iha salaun (MSSI), Kaikoli, foin lalais.
Nia dehan, bazeia ba asesmentu ne'ebé sira halo fator ne'ebé kontribui ba taxa trabalho infantil a'as mak situasaun ekonomia familia, liu-liu ladun iha rendimentu ne'ebe diak atu sustenta familia.
Tanba nee, Prezidente Institutu Defeza ba Direitu Labarik, husu ba Komisaun F atu aprezenta ona Lei Protesaun Labarik ba Parlamentu Nasional hodi diskute no halo aprovasaun iha faze final Global.
Ho nunee, bele aprezenta ba iha Governu hodi vigora ona lei refere, atu bele asegura labarik sira nia direitu.
Nia informa dadus ne'ebe sira identifika labarik sira ne'ebé faan sasan iha dalan ninin hamutuk 300 resin husi munisipiu diferente, maibé 40% husi Rejiaun Administrativu Espesial Oecusse Ambeno (RAEOA).
