Proposta ne’ebé Austrália hato’o, tanba kompañia rua ne’e presiza hadi’a no halo revizaun ba dokumentu balun.
Ho proposta estensaun ne’e, Estadu Timor Leste konsidera hanesan sinál di'ak, tanba sei la kona ka livre husi multa, tuir akordu ne’ebé antes ne’e iha ona.
“La’ós ita mak estende, maibé Austrália mak husu. Tanba, ConocoPhilips ho Shell seidauk kompleta sira nia dokumentu balun. Entaun, ita livre husi multa ne’ebé determina ona”.
Sekretáriu Estadu Komunikasaun Sosiál (SEKOMS) Mericio Juvinál dos Reis Akara informa novidade ne’e ba jornalista sira, hafoin enkontru ho lider bankada sira iha Parlamentu Nasionál horisehik.
Nia hatutan, ho estensaun ne’e maka, maski kompleta ona dokumentu ba prosesu atu sosa asaun, maibé estadu TL tenke hein to’o fulan Abríl.
“Labele konfuzaun tanba ita preparadu atu selu ohin ka aban, tanba sira mak husu atu estende, entaun ita konkorda. Vantajen ba ita tanba sei la kona multa”, tenik Akara.
Entretantu, akordu transferénsia pagamentu ne’ebé antes ne’e estadu Timor Leste halo ho Kompañia ConocoPhilips no Shell, to’o loron 31 fulan Marsu 2019.
Maibé, kuandu liu ona loron ida ne'e, maka bele kona multa kada loron selu kuaze rihun $48.
Aprezenta Dokumentu ba Públiku
Organizasaun Naun Governamentál Luta Hamutuk (LH) husu governu Timor-Leste atu aprezenta dokumentus sosa asaun ConocoPhilips no Shell ba públiku, antes halo pagamentu.
Pedidu ne’e tanba sosiedade sivíl no públiku hakarak hatene prosesu transferénsia pagamentu.
“Bainhira negosiadór prinsipál halo akordu ho ConocoPhilips no Shell tenke publika dokumentu legál sira”, hateten diretór ezekutivu José Alves da Silva iha knaar fatin Faról Dili (28/3).
José Alves husu tanba durante ne’e nia parte rona informasaun orál de’it, nune’e sei sai dúvida kona-bá informasaun ne’ebé dehan estadu TL sei kona multa.
