Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, husi kazu foun detetadu ohin iha mane na’in 66 no feto 50.

“Kazu foun ne’ebé relata ohin 116 kompostu husi Dili 98 iha Díli no na’in 18 husi munisípiu seluk, sira ne’ebé ho idade tinan 12 mai kraik iha na’in 3, idade entre na’in 12 to’o 59 iha na’in 105 ka hanesan ho 90% no idade 60 ba leten iha na’in 8,”dehan nia liu husi zoom, domingo ohin (09/05).

Rui esplika, husi kazu detetadu foun ohin, porpurasaun kazu sintomatiku ka hirak ne’ebé hatudu iha sintomas hamutuk 10,3%.

Ho nune’e total komulativu kazu konfirmadu sura husi loron 21 fulan-marsu tinan 2020 to’o loron 9 fulan-maiu tinan 2021 hamutuk 3,227.

Husi horiseik (08/05) mai ohin (09/05) teste PCR ne'ebé Laboratóriu Nasionál Saúde halo iha Dili hamutuk 1,256 kompostu husi, Vijilánsia sentinela 25, Rastreiu ba kontaktu (Contact tracing) 56, Rastreiu Aleatoriu (Random Screening) 780, Viájen sai husi serka sanitária husi Dili 380, no Follow up iha kuarentena 15.

Aliende, total testes PCR ne’ebé halo horseik loron 8 fulan-maiu iha munisípiu sira seluk hamutuk 374 kompostu husi, Baucau iha 120, Ermera 42, Maubisse 132, Suai 39 no  Vikeke 41.

Entretantu kazu Óbitu relasiona ho Covid-19 hamutuk na’in 5 kompostu husi mane na’in 2 no feto na’in 3.

Asisten Editor: Saturnina da Costa