Kordenador Jeral Ekipa Prevensaun Covid-19, Odete Viegas relata katak, kazu foun Covid-19 ba loron ohin (11/2) hamutuk na’in 14 no total ema ne’ebé agora dadaun baixa iha sala isolamentu Sentru Saude Vera Kruz hamutuk na’in 38.

Odete dehan, kazu pozitivu foun hamutuk na’in 14 ne’e, kompostu husi mane na’in 6, feto na’in 8, inklui ema estranjeiru na’in 2. Maski konfirmadu positivu maibé pasiente sira ne’e laiha sintomas ho kondisaun saude normal hela.

Husi total pasiente hirak ne’e, na’in ida ema estranjeiru no na’in ida seluk husi profesional saude ne’ebé durante ne’e tau matan ba ema moras Covid -19.

Husi ema na’in 14 ne’e, na’in 13 mai husi provinsia oin oin iha Indonesia liu husi mota-ain Batugade iha loron 20 Janeiru.

Sira karantina iha Hotel sira iha Dili. Hafoin teste rezultadu hatudu katak sira na’in 13 ne’e positivu Covid-19 no na’in ida hanesan profesional saude ne’ebé durante ne’e tau matan pasiente Covid-19.

“Maski numeru Covid -19 ne'e aumenta maibé ohin loron mos ema na’in lima mak rekopera sira nia saude, entre sira na’in 5 ne’e mane 2, feto na’in 3 no ema estranjeiru na’in rua. Sira na’in 5 ne’e reintrega ona ba sira nia familia,”dehan Odete iha konferensia imprensa.

Total komulativu kazu  hamtuk 100, hein rejultadu teste hamutuk na’in 102, total karantina ba loron ohin hamutuk 297, kompostu husi Dili na’in 179, Municipio na’in 118.