Vsie PM ne’ebé asume mós kargu nu’udar Ministru Dezenvolvimentu Rurál no Abitasaun Komunitaria ne’e hatete, bainhira hasoru MI sei diskuti liu-liu kona-ba kuota iha rekrutamentu ba membru PNTL.

"Rekrutamentu ba PNTL foun ne'e hau sei hato'o Ministru Interiór. Ita laiha jatah-jatah iha ne'ebá, tuir lolós ne'e hotu igual, hanesan, atu nune'e fó kontinuidade misaun importante ba pás nian, ita presiza polísia profisional," dehan Assanami, iha Bekora, Sesta (29/08).

Vise PM ne’e hatutan, nia sei hato'o ba Ministériu Interior atu labele hamosu tan irregularidade sira hanesan ne'e iha rekrutamentu.

"Ne'ebé ha'u sei hato'o ba iha Ministru Interiór par se karik iha jatah-jatah ba rekrutamentu PNTL ne'e haree didi'ak. Atu dehan uluk saida mak ita halo pasadu ne'e Ministru Assuntu Kombatante Liberasaun Nasionál tau ona obrigasaun iha ne'ebá, laiha ona jatah-jatah iha ne'ebá."

Nia fó ezemplu, hanesan dadaun ne'e estudante sira atu tama iha Universidade Nasionál Timor Lorosa'e (UNTL), rejime espesiál ba iha veteranus nia oan la eziste ona.

Assanami hatutan, lei ne'ebé foin lalais governu aprezenta ne'e hasai hotu ona aktu ida kona-ba familiarizmu iha rekrutamentu nia ne'e.

"Lei foin lalais ami aprezenta, ami hasai tiha par labele iha ona jatah-jatah iha ne'ebá, hotu-hotu tenke igual, par atu bele kontribui no atu luta no kompete ba oportunidade ne'ebé hanesan," katak nia.

Vise PM ne’e dehan, governu sei esforsu hodi minimiza teste vagatura sira ne'ebé sei implementa familiarizmu iha laran.

"Kona-ba rekrutamentu familiárizmu ne'ebé sei eziste ne'e, parte governu sei halo esforsu ba iha ne'e hodi minimiza. Ami sei esforsu, maibé labele hein, tanba tempu ba dadaun."

"Familiárizmu kontinua eziste ne'e mak daudaun ne'e implementa ona sistema online. Ita boot sira hare'e, daudaun ne'e ita utiliza hela sistema online hodi halo teste ba profesór sira, teste online no rezultadu sira hetan kedas, tanba responde iha online ne'ebá. Ida ne'e atu evita rekrutamentu familiárizmu iha ita-nia rai,” nia esplika.